Lassie, Dear Lassie

Lassie, dear lassie, the dew 's on the gowan,
And the brier-bush is sweet whar the burnie is rowin',
But the best buds of Nature may blaw till they weary,
Ere they match the sweet e'e or the cheek o' my dearie!

I wander alane, when the gray gloamin' closes,
And the lift is spread out like a garden o' roses;
But there 's nought which the earth or the sky can discover
Sae fair as thysell to thy fond-hearted lover!

The snaw-flake is pure frae the clud when it 's shaken,
And melts into dew ere it fa's on the bracken,
Oh sae pure is the heart I hae won to my keepin'!
But warm as the sun-blink that thaw'd it to weepin'!

Then come to my arms, and the bosom thou 'rt pressing
Will tell by its throbs a' there's joy in confessing,
For my lips could repeat it a thousand times over,
And the tale still seem new to thy fond-hearted lover.