I'm Naebody Noo

I 'm naebody noo; though in days that are gane,
When I 'd hooses, and lands, and gear o' my ain,
Ther war' mony to flatter, and mony to praise--
And wha but mysel' was sae prood in those days!

Ah! then roun' my table wad visitors thrang,
Wha laugh'd at my joke, and applauded my sang,
Though the tane had nae point, and the tither nae glee;
But, of coorse, they war' grand when comin' frae me!

Whan I 'd plenty to gie, o' my cheer and my crack,
Ther war' plenty to come, and wi' joy to partak';
But whanever the water grew scant at the well,
I was welcome to drink all alane by mysel'!

Whan I 'd nae need o' aid, there were plenty to proffer;
And noo whan I want it, I ne'er get the offer;
I could greet whan I think hoo my siller decreast,
In the feasting o' those who came only to feast.

The fulsome respec' to my gowd they did gie,
I thoucht a' the time was intended for me;
But whanever the end o' my money they saw,
Their friendship, like it, also flicker'd awa'.

My advice ance was sought for by folks far and near,
Sic great wisdom I had ere I tint a' my gear;
I 'm as weel able yet to gie counsel, that 's true,
But I may jist haud my wheesht, for I 'm naebody noo.