Lord Donald

O where hae ye been a' day, Lord Donald, my son?
O where hae ye been a' day, my jolly young man?"
"I've been awa courtin':--mither, mak my bed sune,
For I'm sick at the heart, and I fain would lie doun."

"What wad ye hae for your supper, Lord Donald, my son?
What wad ye hae for your supper, my jolly young man?"
"I've gotten my supper:--mither, mak my bed sune,
For I'm sick at the heart, and I fain would lie doun."

"What did ye get for your supper, Lord Donald, my son?
What did ye get for your supper, my jolly young man?"
"A dish of sma' fishes:--mither, mak my bed sune,
For I'm sick at the heart, and I fain wad lie doun."
"Where gat ye the fishes, Lord Donald, my son?
Where gat ye the fishes, my jolly young man? ''
"In my fathers black ditches:--mither, mak my bed sune,
For I'm sick at the heart, and I fain would lie doun."

"What like were your fishes, Lord Donald, my son?
What like were your fishes, my jolly young man?"
"Black backs and speckl'd bellies:--mither, mak my bed sune,
For I'm sick at the heart, and I fain would lie doun."
"O I fear ye are poison'd, Lord Donald, my son!
O I fear ye are poison'd, my jolly young man!"
"O yes! I am poison'd:--mither, mak my bed sune,
For I'm sick at the heart, and I fain wad lie doun."

"What will ye leave to your father, Lord Donald, my son?
What will ye leave to your father, my jolly young man?"
"Baith my houses and land:--mither, mak my bed sune,
For I'm sick at the heart, and I fain wad lie doun."

"What will ye leave to your brither, Lord Donald, my son?
What will ye leave to your brither, my jolly young man?"
"My horse and the saddle:--mither, mak my bed sune,
For I'm sick at the heart, and I fain wad lie doun."

"What will ye leave to your sister, Lord Donald, my son?
What will ye leave to your sister, my jolly young man?"
"Baith my gold box and rings mither, mak my bed sune,
For I'm sick at the heart, and I fain wad lie doun."

"What will ye leave to your true-love, Lord Donald, my son?
What will ye leave to your true-love, my jolly young man?"
"The tow and the halter, for to hang on yon tree,
And lat her hang there for the poisoning o' me."