Now wolde I faine some merthés make

Now wolde I faine some merthés make,

All only for my lady’s sake,
When her I see;
But now I am so far fro her
It will not be.
Thogh I be far out of her sight,
I am her man bothe day and night,
And so wol be.
Therefore wolde as I love her
She lovéd me.

Whan she is mery, than am I glad;
Whan she is sory, than am I sad;
And causé why,
For he liveth not that loveth her
As well as I.

She saith that she hath seen hit wreten
That seldin seen is soon forgeten;
It is not so,
For in good feith, save only her,
I love no mo.

Wherefore I pray bothe nighte and day
That she may cast alle care away,
And leve in rest,
And evermore wherever she be
To love me best.

And I to her for to be trew,
And never chaunge her for no new
Unto mine end,
And that I may in her servise
For ever amend.
A. GopwHEN.