Good day, good day

Good day, good day,
My lord sire Cristémasse, good day!

Good day, sire Cristémas our kinge,
For every man bothe olde and yinge
Is glad and blithe of youre cominge.
Good day!

Godés sone so moche of might,
Fram heven to erthé doun is light,
And borne is of a maide so bright.
Good day!

Heven and erthe and also helle,
And alle that ever in hem dwelle,
Of youre cominge they beth ful snelle.
Good day!

Of youre cominge this clerkés finde,
Ye comé to save all man kinde,
And of here balés hem unbinde.
Good day!

All maner of merthés we wole make,
And solas to oure hertés take,
My semely lordé, for youre sake.
Good day!