Oh! Sair I Feel the Witching Power

Oh, sair I feel the witching power
O' that sweet pawkie e'e,
And sair I 'll rue the luckless hour
That e'er it shone on me;
Unless sic love as wounds this heart
Come frae that heart again,
And teach for aye the kindly ray
To blink on me alane.
Thy modest cheek aye mantling glows
Whene'er I talk o' love,
As rainbow rays upon the rose
Its native sweets improve;
Yet when the sunbeams leave yon tower,
And gloamin' vails the glen,
Will ye gang to the birken bower
When nane on earth can ken?
Oh, scenes delighting, smiles inviting,
Heartfelt pleasures len',
And oh! how fain to meet alane,
When nane on earth can ken!

Amang the lave I manna speak,
And when I look the while,
The mair I 'm seen, the mair I seek
Their watching to beguile;
But leave, dear lassie, leave them a',
And frae this heart sae leal
Thou 'lt hear the love, by glen and shaw,
It canna mair conceal.
My plaid shall shield thy peerless charms
Frae evening's fanning gale,
And saft shall be my circling arms,
And true my simple tale;
And seated by the murmuring brook,
Within the flowery den,
If love 's reveal'd in word or look,
There 's nane on earth can ken.
Oh! scenes delighting, smiles inviting,
Heartfelt pleasures len',
And oh! how fain to meet alane,
When nane on earth can ken.

There 's music in the lighted ha',
And looks in laughing een,
That seem affection forth to show,
That less is felt than seen.
But silent in the faithfu' heart
The charm o' love shall reign,
Or words shall but its power impart
To make it mair our ain.
Let worldlings doat upon their wealth,
And spendthrifts hae their glee,
Not a' the state o' a' the great,
Shall draw a wish frae me;
Away wi' thee by glen an' bower,
Far frae the haunts o' men,
Oh! a' the bliss o' hour like this,
The world can never ken.
Oh! scenes delighting, smiles inviting,
Heartfelt pleasures len',
And aye how fain we 'll meet again,
When nane on earth can ken.