Thou Gloomy Feberwar

Thou cauld gloomy Feberwar,
Oh! gin thou wert awa'!
I 'm wae to hear thy soughin' winds,
I 'm wae to see thy snaw;
For my bonnie, braw, young Hielandman,
The lad I lo'e sae dear,
Has vow'd to come and see me
In the spring o' the year.

A silken ban' he gae me,
To bin' my gowden hair;
A siller brooch and tartan plaid,
A' for his sake to wear;
And oh! my heart was like to break,
(For partin' sorrow 's sair)
As he vow'd to come and see me
In the spring o' the year.

Aft, aft as gloamin' dims the sky,
I wander out alane,
Whare bud the bonnie yellow whins,
Around the trystin' stane;
'Twas there he press'd me to his heart,
And kiss'd awa' the tear,
As he vow'd to come and see me
In the spring o' the year.

Ye gentle breezes, saftly blaw,
And cleed anew the wuds;
Ye laverocks lilt your cheerie sangs,
Amang the fleecy cluds;
Till Feberwar and a' his train,
Affrighted disappear,
I 'll hail wi' you the blithesome change,
The spring-time o' the year.