Robin Shure In Hairst

Chorus.—Robin shure in hairst,
I shure wi’ him.
Fient a heuk had I,
Yet I stack by him.

I gaed up to Dunse,
To warp a wab o’ plaiden,
At his daddie’s yett,
Wha met me but Robin:
Robin shure, &c.

Was na Robin bauld,
Tho’ I was a cotter,
Play’d me sic a trick,
An’ me the El’er’s dochter!
Robin shure, &c.

Robin promis’d me
A’ my winter vittle;
Fient haet he had but three
Guse-feathers and a whittle!
Robin shure, &c.