Wha 's at the Window

Oh, wha's at the window, wha, wha?
Oh, wha's at the window, wha, wha?
Wha but blithe Jamie Glen,
He 's come sax miles and ten,
To tak' bonnie Jeannie awa, awa,
To tak' bonnie Jeannie awa.

He has plighted his troth, and a', and a',
Leal love to gi'e, and a', and a',
And sae has she dune,
By a' that 's abune,
For he lo'es her, she lo'es him, 'bune a', 'bune a',
He lo'es her, she lo'es him, 'bune a'.

Bridal-maidens are braw, braw,
Bridal-maidens are braw, braw,
But the bride's modest e'e,
And warm cheek are to me
'Bune pearlins, and brooches, and a', and a',
'Bune pearlins, and brooches, and a'.

It 's mirth on the green, in the ha', the ha',
It 's mirth on the green, in the ha', the ha';
There 's quaffing and laughing,
There 's dancing and daffing,
And the bride's father 's blithest of a', of a',
The bride's father 's blithest of a'.

It 's no that she 's Jamie's ava, ava,
It 's no that she 's Jamie's ava, ava,
That my heart is sae eerie
When a' the lave 's cheerie,
But it 's just that she 'll aye be awa, awa,
It 's just that she 'll aye be awa.