Hyde, Absolon, thy gilté tresses clere

Hyde, Absolon, thy gilté tresses clere;
Ester, ley thou thy meknesse al adoun;
Hyde, Jonathas, al thy frendly manere;
Penalopee, and Marcia Catoun,
Make of your wyfhod no comparisoun;
Hyde ye your beautés, Isoude and Eleyne.
My lady cometh, that al this may disteyne.

Thy fairé body, lat hit nat appere,
Lavyne; and thou, Lucresse of Romé toun,
And Polixene, that boghten love so dere,
And Cleopatre, with al thy passioun,
Hyde ye your trouthe of love and your renoun;
And thou, Tisbe, that hast of love swich peyne.
My lady cometh, that al this may disteyne.

Hero, Dido, Laudomia, alle yfere,
And Phyllis, hanging for thy Demophoun,
And Canace, espyéd by thy chere,
Ysiphile, betrayséd with Jasoun,
Maketh of your trouthé neyther boost ne soun;
Nor Ypermistre or Adriane, ye tweyne.
My lady cometh, that al this may disteyne.