Lord Randal (Child 12L)

'Whar hae ye been a' the day, Willie doo, Willie doo?
Whar hae ye been a' the day, Willie, my doo?'

'I've been to see my step-mother; make my bed, lay me down;
Make my bed, lay me down, die shall I now!'

'What got ye frae your step-mother, Willie doo, Willie doo?
What got ye frae your step-mother, Willie, my doo?'

'She gae me a speckled trout; make my bed, lay me down;
She gae me a speckled trout, die shall I now!'

'Whar got she the speckled trout, Willie doo, Willie doo?'
'She got it amang the heather hills; die shall I now.'

'What did she boil it in, Willie doo, Willie doo?'
'She boild it in the billy-pot; die shall I now!'

'What gaed she you for to drink, Willie doo, Willie doo?
What gaed she you for to drink, Willie, my doo?'

'She gaed me hemlock stocks; make my bed, lay me down;
Made in the brewing pot; die shall I now!'

They made his bed, laid him down, poor Willie doo, Willie doo;
He turnd his face to the wa; he 's dead now!