The Ballad of Lord Bernard Stewart, Lord of Aubigny

Renownit, ryall, right reuerend and serene
Lord, hie trywmphing in wirschip and valoure,
Fro kyngis downe most Cristin knight, and kene,
Most wyse, most valyeand, most laureat hie wictour,
Onto the sterris vpheyt is thyne honour ;
In Scotland Welcum be thyne Excellence
To King, Queyne, lord, clerk, knight and seruatour,
Withe gloire and honour, lawde and reuerence.

Welcum in stour most strong, incomparable knight,
The fame of armys, and floure of vassalage ;
Welcum in were moste worthi, wyse and wight ;
Welcum the soun of Mars of moste curage ;
Welcum moste lusti branche of our linnage,
In euery realme oure scheild, and our defence ;
Welcum our tendir blude of hie parage,
With gloire and honour, lawde and reuerence.

Welcum in were the secund Iulius,
The prince of knightheyd, and flour of cheualry ;
Welcum most valyeant and victorius ;
Welcum invincible victour moste wourthy ;
Welcum our Scottis chiftane most dughty ;
Wyth sowne of clarioun, organe, song and sence,
To the atonis, Lord, Welcum all we cry ;
With gloire and honour, lawde and reuerence.

Welcum oure indeficient adiutorie,
That evir our Naceoun helpit in thare neyd ;
That neuer saw Scot yit indigent nor sory,
Bot thou did hym suport, with thi gud deid ;
Welcum, therfor, abufe all livand leyd,
Withe us to liue, and to maik recidence,
Quhilk never sall swnye for thy saik to bleid :
To quham be honour, lawde and reuerence.

Is none of Scotland borne faithfull and kynde,
Bot he of naturall inclinacioune
Dois favour the, withe all his hert and mynde,
Withe fervent, tendir, trew intencioun ;
And wald of inwart hie effectioun,
Bot dreyd of danger, de in thi defence,
Or dethe, or schame, war done to thi persoun ;
To quham be honour, lawde and reuerence.

Welcum thow knight, moste fortunable in feild ;
Welcum in armis moste aunterus and able,
Wndir the soun that beris helme or scheild ;
Welcum thou campioun, in feght wnourcumable ;
Welcum most dughti, digne, and honorable,
And moist of lawde, and hie magnificence,
Nixt wndir kingis to stand incomparable ;
To quham be honour, lawde and reuerence.

Throw Scotland, Ingland, France, and Lumbardy,
Fleys on weyng thi fame, and thi renoune ;
And our all cuntreis, wndirnethe the sky,
And our all strandis, fro the sterris doune ;
In euery province, land, and regioun,
Proclamit is thi name of excellence,
In euery cete, village, and in toune,
Withe gloire and honour, lawd and reuerence.

O feyrse Achill, in furius hie curage !
O strong invincible Hector, vndir scheild !
O vailyeant Arthur, in knyghtli vassalage !
Agamemnon, in gouernance of feild !
Bold Henniball, in batall to do beild !
Iulius, in iupert, in wisdom and expence !
Most fortunable chiftane, bothe in yhouth and eild,
To the be honour, lawde and reuerence !

At parlament thow suld be hye renownit,
That did so mony victoryse opteyn ;
Thi cristall helme with lawry suld be crownyt,
And in thi hand a branche of olyve greyn ;
The sueird of conquis, and of knyghtheid keyn,
Be borne suld highe before the in presence,
To represent sic man as thou has beyn ;
With gloire and honour, lawde and reuerence.

Hie furius Mars, the god armipotent,
Rong in the hevin at thyne natiuite ;
Saturnus doune, withe fyry eyn, did blent,
Throw bludy visar, men manasing to gar de ;
On the fresche Wenus keist hir amourouse E ;
On the Marcurius furtheyet his eloquence ;
Fortuna Maior did turn hir face on the ;
With gloire and honour, lawde and reuerence.

Prynce of fredom, and flour of gentilnes,
Sweyrd of knightheid, and choise of cheualry,
This tyme I lefe, for grete prolixitnes,
To tell quhat feildis thou wan in Pikkardy,
In France, in Bertan, in Naplis, and Lumbardy ;
As I think eftir, withe all my diligence,
Or thow departe, at lenthe for to discry ;
With gloire and honour, lawd and reuerence.

B, in thi name, betaknis batalrus ;
A, able in feild ; R, right renoune most hie ;
N, nobilnes ; and A, for aunterus ;
R, ryall blude ; for dughtines, is D ;
W, valyeantnes ; S, for strenewite ;
Quhoise knyghtli name, so schynyng in clemence,
For wourthines in gold suld writtin be ;
With gloire and honour, lawd and reuerence.