Ffollowis the Amendis made be him to the Telȝouris and Sowtaris for the Turnament

Betuix twell houris and ellevin,
I dremed ane angell came fra Hevin,
With plesand stevin sayand on hie,
Telȝouris and Sowtaris, blist be ȝe.

In Hevin hie ordand is ȝour place,
Aboif all Sanctis in grit solace,
Nixt God, grittest in dignitie :
Tailȝouris and Sowtaris, blist be ȝe.

The causs to ȝow is nocht vnkend,
That God mismakkis ȝe do amend,
Be craft and grit agilitie :
Tailȝouris and Sowtaris, blist be ȝe.

Sowtaris, with schone weill maid and meit,
Ȝe mend the faltis of ill maid feit,
Quhairfoir to Hevin ȝour saulis will fle ;
Telȝouris and Sowtaris, blist be ȝe.

Is nocht in all this fair a flyrok,
That hes vpoun his feit a wyrok,
Knowll tais, nor mowlis in no degrie,
Bot ȝe can hyd thame : blist be ȝe.

And ȝe tailȝouris, with weilmaid clais
Can mend the werst maid man that gais,
And mak him semely for to se :
Telȝouris and Sowtaris, blist be ȝe.

Thocht God mak ane misfassonit man,
Ȝe can him all schaip new agane,
And fassoun him bettir be sic thre :
Telȝouris and Sowtaris, blist be ȝe.

Thocht a man haif a brokin bak,
Haif he a gude crafty telȝour, quhattrak,
That can it cuver with craftis slie :
Telȝouris and Sowtaris, blist be ȝe.

Off God grit kyndness may ȝe clame,
That helpis his peple fra cruke and lame,
Supportand faltis with ȝour supple :
Tailȝouris and Sowtaris, blist be ȝe.

In erd ȝe kyth sic mirakillis heir,
In Hevin ȝe salbe Sanctis full cleir,
Thocht ȝe be knavis in this cuntre :
Telȝouris and Sowtaris, blist be ȝe.

Quod Dumbar.