Ffredome, Honour and Nobilnes

Ffredome, honour and nobilnes,
Meid, manheid, mirth and gentilnes
Ar now in cowrt reput as vyce ;
And all for causs of cuvetice.

All weilfair, welth and wantones
Ar chengit in-to wretchitnes,
And play is sett at littill price ;
And all for causs of covetyce.

Halking, hunting and swift horss rynning
Ar chengit all in wrangus wynnyng ;
Thair is no play bot cartis and dyce ;
And all for causs of covetyce.

Honorable houshaldis ar all laid doun ;
Ane laird hes with him bot a loun,
That leidis him eftir his devyce ;
And all for causs of covetyce.

In burghis, to landwart and to sie,
Quhair was plesour and grit plentie,
Vennesoun, wyld fowill, wyne and spyce,
Ar now decayid thruch covetyce.

Husbandis that grangis had full grete,
Cattell and corne to sell and ete,
Hes now no beist bot cattis and myce ;
And all thruch caus of covettyce.

Honest ȝemen in every toun
War wont to weir baith reid and broun,
Ar now arrayit in raggis with lyce ;
And all thruch caus of covetyce.

And lairdis in silk harlis to the eill,
For quhilk thair tennentis sald somer meill,"
And leivis on rutis vndir the ryce;
And all thruch caus of covetyce.

Quha that dois deidis of petie,
And leivis in pece and cheretie,
Is haldin a fule, and that full nyce ;
And all thruch caus of covetyce.

And quha can reive vthir menis rowmis,
And vpoun peur men gadderis sowmis,
Is now ane active man and wyice ;
And all thruch caus of covetyce.

Man, pleiss thy makar and be mirry,
And sett not by this warld a chirry ;
Wirk for the place of paradyce,
For thairin ringis na covettyce.