My Ain Mountain Land

Oh! wae 's me on gowd, wi' its glamour and fame,
It tint me my love, and it wiled me frae hame,
Syne dwindled awa' like a neivefu' o' sand,
And left me to mourn for my ain mountain land.

I long for the glens, and the brown heather fells,
The green birken shades, where the wild lintie dwells,
The dash o' the deep, on the gray rocky strand,
That gird the blue hills o' my ain mountain land.

I dream o' the dells where the clear burnies flow,
The bonnie green knowes where the wee gowans grow;
But I wake frae my sleep like a being that 's bann'd,
And shed a saut tear for my ain mountain land.

I ken there 's a lass that looks out on the sea,
Wi' tears in the een that are watchin' for me;
Lang, lang she may wait for the clasp o' my hand,
Or the fa' o' my foot in my ain mountain land.