Oh, Blaw, Ye Westlin' Winds!

Oh, blaw, ye westlin' winds, blaw saft
Amang the leafy trees!
Wi' gentle gale, frae muir and dale,
Bring hame the laden bees;
And bring the lassie back to me,
That 's aye sae neat and clean;
Ae blink of her wad banish care,
Sae lovely is my Jean.

What sighs and vows, amang the knowes,
Hae pass'd atween us twa!
How fain to meet, how wae to part,
That day she gaed awa'!
The Powers aboon can only ken,
To whom the heart is seen,
That nane can be sae dear to me
As my sweet, lovely Jean.