The Ressoning betwixt Deth and Man

" O mortall man, behald, tak tent to me,
Quhilk suld thy mirrour be baith day and nicht;
All erdly thing that evir tuik lyfe mon de:
Paip, empriour, king, barroun and knycht,
Thocht thay be in thair royall stait and hicht,
May nocht ganestand, quhen I pleise schute this derte;
Wal townis, castellis, and towiris, nevir so wicht,
May nocht resist quhill it be at his herte."

MAN.
" Now quhat art thow that biddis me thus tak tent,
And mak ane mirrour day and nicht of the?
Or with thy dert I suld rycht sair repent?
I trest trewly of that thow sail sone le.
Quhat freik on fold sa bald dar manis me,
Or with me fecht, owthir on fute or horse?
Is non so wicht, or stark in this cuntre,
Bot I sail gar him bow to me on forse."

DETH.
My name, forsuth, sen that thow speiris,
Thay call me Deid, suthly I the declair,
Calland all, man and woman, to thair beiris,
Quhen-evir I pleise, quhat tyme, quhat place, or quhair?
Is nane sa stout, sa fresche, nor yit sa fair,
Sa yung, sa aid, sa riche, nor yit sa peur,
Quhair-evir I pass, owthir lait or air,
Mon put thame haill on forse undir my cure."

MAN.
" Sen it is so, that Nature can so wirk,
That yung and auld, with riche and peur, mon de,
In my youtheid, allace, I wes full irk,
Could not tak tent to gyd and governe me,
Ay gude to do, fra evill deidis to fle,
Trestand ay youtheid wald with me abyde,
Fulfilland evir my sensualitie
In deidly syn, and specialy in pryd.'

DETH.
" Thairfoir repent and remord thy conscience;
Think on thir wordis I now upoun the cry:
O wrechit man! O full of ignorance!
All thy plesance thow sail richt deir aby;
Dispone thy-self and cum with me in hy,
Edderis, askis, and wormis meit for to be;
Cum quhen I call, thow ma me not deny,
Thocht thow war Paip, Empriour and King, all thre."

MAN.
" Sen it is swa fra the I may not chaip,
This wrechit warld for me heir I defy,
And to the deid, to lurk under thy caip,
I offer me with hairt richt humily;
Beseiking God, the divill, myne ennemy,
No power haif my sawill till assay,
Jesus, on The, with peteous voce, I cry,
Mercy on me to haif on domis day.'