Sum Practysis of Medecyne

Guk, guk, gud day, Schir, gaip quhill ye get it,
Sic greting may gane weill gud laik in your hude,
Ye wald deir me, I trow, because I am dottit,
To ruffill me with a ryme; na, Schir, be the rude
Your saying I haif sene, and on syde set it,
As geir of all gaddering, glaikit, nocht gude;
Als your medicyne by mesour I haif meit, met it,
The quhilk, I stand ford, ye nocht understude,
Bot wrett on as ye culd to gar folk wene;
For feir my longis wes flaft
Or I wes dottit or daft,
Grife I can ocht of the craft
Heir be it sene.

Becaus I ken your cunnyng in to cure
Is clowtit and clampit and nocht weill cleird,
My prettik in pottingary ye trow be als pure,
And lyk to your lawitnes, I schrew thame that leid;
Is nowdir fevir, nor fell, that our the feild fure,
Seiknes nor sairnes, in tyme gif I seid,
Bot I can lib thame and leiche thame fra lame and lesure,
With sawis thame sound mak: On your saule beid,
That ye be sicker of this sedull I send yow,
With the suthfast seggis
That glean all egeis
With dia and dreggis
Of malis to mend yow.

DIA CULCAKIT.
Cape cukmaid and crop the colleraige,
Ane medecyne for the maw, and ye cowth mak it.
With sweit satlingis and sowrokis, the sop of the sege,
The crud of my culome, with your teith crakit;
Lawrean and linget seid, and the luffage,
The hair of the hurcheoun nocht half deill hakkit,
With the snout of ane selch, ane swelling to swage;
This cure is callit in our craft Dia Culcakkit,
Put all thir in ane pan, with pepper and pik,
Syne sottin to this,
The count of ane sow kiss.
Is nocht bettir, I wis,
For the collik.

DIA LONGUM.
Recipe, thre ruggis of the reid ruke,
The gant of ane gray meir, the claik of ane guse,
The dram of ane drekterss, the douk of an duke,
The gaw of ane grene dow, the leg of ane louse,
Fy ve unce of ane fle wing, the fyn of ane fluke,
With ane sleiffull of slak, that growis in the sluss;
Ming all thir in ane mass with the mone cruke.
This untment is rycht ganand for your a win uss,
With reid nettill seid in Strang wesche to steip,
For to bath your ba cod,
Quhen ye wald nop and nod;
Is nocht bettir, be God
To latt yow to sleip.

DIA &LACONICON.
This dia is rycht deir and denteit in daill,
Cause it is trest and trew, thairfoir that ye tak
Sevin sobbis of ane seiche, the quhidder of ane quhaill,
The lug of ane lempet is nocht to forsaik,
The harnis of ane haddok, hakkit or haill,
With ane bustfull of blude of the scho-bak
With ane brewing caldrun full of hait caill,
For it wil be softar and sweittar of the smak;
Thair is nocht sic ane lechcraft fra Lawdian to Lundin:
It is clippit in our cannon
Dia Glecolicon,
For till fle awaye son
Quhair fulis ar fundin.

DIA CUSTRUM.
The ferd feisik is fyne, and of ane felloun pryce,
Gud for haising and hosting, or heit at the hairt;
Recipe, Thre sponfull of the blak spyce,
With ane grit gowpene of the gowk fart;
The lug of ane lyoun, the guse of ane gryce;
Ane unce of ane oster poik at the nether parte,
Annoyntit with nurice doung, for it is rycht nyce,
Myngit with mysdirt and with mustart;
Ye may clamp to this cure, and ye will mak cost,
Bayth the bellox of ane brok,
With thre crawis of the cok,
The schadow of ane yule stok,
Is gud for the host.

Gud nycht, guk, guk, for sa I began,
I haif na come at this tyme langer to tary,
Bot luk on this letter, and leird, gif ye can,
The prectik and poyntis of this pottingary;
Schir, minister this medecyne at evin to sum man,
And or pryme be past, my powder I pary,
Thay sail bliss yow, or ellis bittirly yow ban;
For it sail fle thame, in faith, out of the fary:
Bot luk quhen ye gaddir thir gressis and gerss,
Outhir sawrand or sour,
That it be in ane gud oure:
It is ane mirk mirrour,
Ane uthir manis erss.