Hielan' Heather

Hey for the Hielan' heather!
Hey for the Hielan' heather!
Dear to me, an' aye shall be,
The bonnie braes o' Hielan' heather!

The moss-muir black an' mountain blue,
Whare mists at morn an' gloamin' gather;
The craigs an' cairns o' hoary hue,
Whare blooms the bonnie Hielan' heather!
Hey for the Hielan' heather!

Whare monie a wild bird wags its wing,
Baith sweet o' sang an' fair o' feather;
While cavern'd cliffs wi' echo ring,
Amang the hills o' Hielan' heather!
Hey for the Hielan' heather!

Whare, light o' heart an' light o' heel,
Young lads and lasses trip thegither;
The native Norlan rant and reel
Amang the halesome Hielan' heather!
Hey for the Hielan' heather!

The broom an' whin, by loch an' lin,
Are tipp'd wi' gowd in simmer weather;
How sweet an' fair! but meikle mair
The purple bells o' Hielan' heather!
Hey for the Hielan' heather!

Whare'er I rest, whare'er I range,
My fancy fondly travels thither;
Nae countrie charms, nae customs change
My feelings frae the Hielan' heather!
Hey, for the Hielan' heather!