Ae Happy Hour

The dark gray o' gloamin',
The lone leafy shaw,
The coo o' the cushat,
The scent o' the haw;
The brae o' the burnie,
A' bloomin' in flower,
An' twa' faithfu' lovers,
Make ae happy hour.

A kind winsome wifie,
A clean canty hame,
An' smilin' sweet babies
To lisp the dear name;
Wi' plenty o' labour,
An' health to endure,
Make time to row round aye
The ae happy hour.

Ye lost to affection,
Whom avarice can move
To woo an' to marry
For a' thing but love;
Awa' wi' your sorrows,
Awa' wi' your store,
Ye ken na the pleasure
O' ae happy hour.