Lizzy Frew

'Twas a balmy summer gloamin',
When the sun had gane to rest,
And his gowden beams were glintin'
Owre the hills far in the west;
And upon the snawy gowan
Saftly fell the pearly dew,
When I met my heart's best treasure,
Gentle, winsome Lizzy Frew.

Light she tripp'd amang the bracken,
While her glossy waving hair
Play'd around her gentle bosom,
Dancing in the summer air.
Love laugh'd in her een sae paukie,
Smiles play'd round her rosy mou',
And my heart was led a captive
By the charms o' Lizzie Frew.

Thochts o' her can mak' me cheerie,
As I toil the lee-lang day;
And at nicht, though e'er sae wearie,
Gladly out wi' her I stray.
I ask nae for a greater pleasure,
Than to ken her heart is true--
I ask nae for a greater treasure,
Than my gentle Lizzie Frew.