Neil Gow's Farewell to Whisky

You 've surely heard of famous Neil,
The man who play'd the fiddle weel;
He was a heartsome merry chiel',
And weel he lo'ed the whisky, O!
For e'er since he wore the tartan hose
He dearly liket Athole brose!
And grieved he was, you may suppose,
To bid "farewell to whisky," O!

Alas! says Neil, I'm frail and auld,
And whiles my hame is unco cauld;
I think it makes me blythe and bauld,
A wee drap Highland whisky, O!
But a' the doctors do agree
That whisky 's no the drink for me;
I 'm fley'd they'll gar me tyne my glee,
By parting me and whisky, O!

But I should mind on "auld lang syne,"
How Paradise our friends did tyne,
Because something ran in their mind--
Forbid--like Highland whisky, O!
Whilst I can get good wine and ale,
And find my heart, and fingers hale,
I 'll be content, though legs should fail,
And though forbidden whisky, O!

I 'll tak' my fiddle in my hand,
And screw its strings whilst they can stand,
And mak' a lamentation grand
For guid auld Highland whisky, O!
Oh! all ye powers of music, come,
For deed I think I 'm mighty glum,
My fiddle-strings will hardly bum,
To say, "farewell to whisky," O!