The Widow

Oh, there 's naebody hears Widow Miller complain,
Oh, there 's naebody hears Widow Miller complain;
Though the heart o' this warld 's as hard as a stane,
Yet there 's naebody hears Widow Miller complain.

Though totterin' noo, like her auld crazy biel,
Her step ance the lichtest on hairst-rig or reel;
Though sighs tak' the place o' the heart-cheerin' strain,
Yet there 's naebody hears Widow Miller complain!

Though humble her biggin', and scanty her store,
The beggar ne'er yet went unserved frae her door;
Though she aft lifts the lid o' her girnel in vain,
Yet there 's naebody hears Widow Miller complain!

Though thin, thin her locks, noo like hill-drifted snaw,
Ance sae glossy and black, like the wing o' the craw;
Though grief frae her mild cheek the red rose has ta'en,
Yet there 's naebody hears Widow Miller complain!

The sang o' the lark finds the Widow asteer,
The birr o' her wheel starts the nicht's dreamy ear;
The tears o'er the tow-tap will whiles fa' like rain,
Yet there 's naebody hears Widow Miller complain!

Ye may hear in her speech, ye may see in her claes,
That auld Widow Miller has seen better days,
Ere her auld Robin dee'd, sae fond an' sae fain'--
Yet there 's naebody hears Widow Miller complain!

Oh, sad was the hour when the brave Forty-twa,
Wi' their wild-sounding pipes, march'd her callant awa';
Though she schules, feeds, an' cleeds his wee orphan wean,
Yet there 's naebody hears Widow Miller complain!

Ye wild wintry winds, ye blaw surly and sair,
On the heart that is sad, on the wa's that are bare;
When care counts the links o' life's heavy chain,
The poor heart is hopeless that winna complain.

The Sabbath-day comes, and the Widow is seen,
I' the aisle o' the auld kirk, baith tidy and clean;
Though she aft sits for hours on the mossy grave-stane,
Yet there 's naebody hears Widow Miller complain!

An' then when she turns frae the grave's lanely sod,
To breathe out her soul in the ear of her God,
What she utters to Him is no kent to ane,
But there 's naebody hears Widow Miller complain!

Ye wealthy an' wise in this fair world o' ours,
When your fields wave wi' gowd, your gardens wi' flowers;
When ye bind up the sheaves, leave out a few grains,
To the heart-broken Widow wha never complains.