Ca' the Yowes to the Knowes

Ca' the yowes to the knowes,
Ca' them where the heather grows,
Ca' them where the burnie rows,
My bonnie dearie.

As I gaed down the water-side,
There I met my shepherd lad,
He row'd me sweetly in his plaid,
An' he ca'd me his dearie.

"Will ye gang down the water-side,
And see the waves sae sweetly glide
Beneath the hazels spreading wide?
The moon it shines fu' clearly.

"Ye shall get gowns and ribbons meet,
Cauf-leather shoon to thy white feet,
And in my arms ye'se lie and sleep,
And ye shall be my dearie."

"If ye'll but stand to what ye've said,
I'se gang wi' you, my shepherd lad,
And ye may row me in your plaid,
And I shall be your dearie."

"While water wimples to the sea,
While day blinks in the lift sae hie,
Till clay-cauld death shall blin' my e'e,
Ye shall be my dearie."