Come Awa', Come Awa'

Come awa', come awa',
An' o'er the march wi' me, lassie;
Leave your southren wooers a',
My winsome bride to be, lassie!
Lands nor gear I proffer you,
Nor gauds to busk ye fine, lassie;
But I 've a heart that 's leal and true,
And a' that heart is thine, lassie!

Come awa', come awa',
And see the kindly north, lassie,
Out o'er the peaks o' Lammerlair,
And by the Links o' Forth, lassie!
And when we tread the heather-bell,
Aboon Demayat lea, lassie,
You 'll view the land o' flood and fell,
The noble north countrie, lassie!

Come awa', come awa',
And leave your southland hame, lassie;
The kirk is near, the ring is here,
And I 'm your Donald Græme, lassie!
Rock and reel and spinning-wheel,
And English cottage trig, lassie;
Haste, leave them a', wi' me to speel
The braes 'yont Stirling brig, lassie!

Come awa', come awa',
I ken your heart is mine, lassie,
And true love shall make up for a'
For whilk ye might repine, lassie!
Your father he has gi'en consent,
Your step-dame looks na kind, lassie;
O that our feet were on the bent,
An' the lowlands far behind, lassie!

Come awa', come awa',
Ye 'll ne'er hae cause to rue, lassie;
My cot blinks blithe beneath the shaw,
By bonnie Avondhu, lassie!
There 's birk and slae on ilka brae,
And brackens waving fair, lassie,
And gleaming lochs and mountains gray--
Can aught wi' them compare, lassie?
Come awa', come awa', &c.