Scotland Yet

Gae, bring my guid auld harp ance mair,--
Gae, bring it free and fast,--
For I maun sing another sang
Ere a' my glee be past;
And trow ye as I sing, my lads,
The burden o't shall be
Auld Scotland's howes, and Scotland's knowes,
And Scotland's hills for me--
I'll drink a cup to Scotland yet
Wi' a' the honours three.

The heath waves wild upon her hills,
And foaming frae the fells,
Her fountains sing o' freedom still,
As they dance down the dells;
And weel I lo'e the land, my lads,
That's girded by the sea;
Then Scotland's dales, and Scotland's vales,
And Scotland's hills for me--
I'll drink a cup to Scotland yet
Wi' a' the honours three.

The thistle wags upon the fields
Where Wallace bore his blade,
That gave her foemen's dearest bluid
To dye her auld gray plaid;
And looking to the lift, my lads,
He sang this doughty glee--
Auld Scotland's right, and Scotland's might,
And Scotland's hills for me--
I'll drink a cup to Scotland yet
Wi' a' the honours three.

They tell o' lands wi' brighter skies,
Where freedom's voice ne'er rang;
Gie me the hills where Ossian lies,
And Coila's minstrel sang;
For I've nae skill o' lands, my lads,
That ken nae to be free;
Then Scotland's right, and Scotland's might,
And Scotland's hills for me--
I'll drink a cup to Scotland yet
Wi' a' the honours three.