To Luve Vnluvit

To luve vnluvit it is ane pane;
For scho that is my souerane,
Sum wantoun man so he hes set hir
That I can get no lufe agane,
Bot brekis my hairt, and nocht the bettir.

Quhen that I went with that sweit may
To dance, to sing, to sport and pley,
And oft-tymes in my armis plet hir,
I do now mvrne both nycht and day,
And brekis my hart, and nocht the bettir.

Quhair I wes wont to se hir go
Rycht trymly passand to and fro
With cumly smylis quhen I met hir;
And now I leif in pane and wo,
And brekis my hart, and nocht the bettir.

Quhattane ane glaikit fule am I,
To slay my-self with malancoly,
Sen weill I ken I may nocht get hir?
Or quhat suld be the caus, and quhy,
To brek my hart, and nocht the bettir?

My hairt, sen thow may nocht hir pleiss,
Adew! As gud lufe cumis as gaiss.
Go chuse ane-vdir and foryet hir.
God gif him dolour and diseiss
That brekis thair hairt, and nocht the bettir.