Woffully araid

Woffully araid,
My blode, man,
For thé ran,
It may not be naid;
My body bloo and wan,
Woffully araid.

Beholde me, I pray thé, with all thi hole reson,
And be not so hard hartid, and ffor this encheson,
Sith I for thi sowle sake was slayne in good seson,
Begylde and betraide by Judas fals treson;
Vnkyndly entretid,
With sharpe corde sore fretid,
The Jewis me thretid,
They mowid, they grynned, they scornyd me,
Condempnyd to deth, as thou maist se,
Woffully araid.

Thus nakyd am I nailid, O man, for thy sake!
I loue thé, then loue me; why slepist thou? awake!
Remembir my tendir hart rote for thé brake,
With panys my vaynys constreyn[e]d to crake;
Thus toggid to and fro,
Thus wrappid all in woo,
Whereas neuer man was so,
Entretid thus in most cruell wyse,
Was like a lombe offerd in sacrifice,
Woffully araid.

Off sharpe thorne I haue worne a crowne on my hede,
So paynyd, so straynyd, so rufull, so red;
Thus bobbid, thus robbid, thus for thy loue ded,
Onfaynyd not deynyd my blod for to shed;
My fete and handes sore
The sturdy nailis bore;
What myȝt I suffir more
Than I haue don, O man, for thé?
Cum when thou list, wellcum to me,
Woffully araide.

Off record thy good Lord y haue beyn and schal bee;
Y am thyn, thou artt myne, my brother y call thee;
Thé love I enterly; see whatt ys befall me!
Sore bettyng, sore thretyng, too mak thee, man, all fre:
Why art thou wnkynde?
Why hast nott mee yn mynde?
Cum ȝytt, and thou schalt fynde
Myne endlys mercy and grace;
See how a spere my hert dyd race,
Woyfully arayd.

Deyr brother, noo other thyng y off thee desyre
Butt gyve me thyne hert fre to rewarde myn hyre:
Y wrouȝt thé, I bowgȝt thé frome eternal fyre;
Y pray thé aray thé tooward my hyȝt empyre,
Above the oryent,
Wheroff y am regent,
Lord God omnypotent,
Wyth me too reyn yn endlys welthe;
Remember, man, thy sawlys helthe.

Woofully arayd,
My blode, man,
For thé rane,
Hytt may nott be nayd;
My body blow and wane,
Woyfully arayde.