My Doggie

The neighbours a' they wonder how
I am sae ta'en wi' Maggie,
But ah! they little ken, I trow,
How kind she 's to my doggie.
Yestreen as we linked o'er the lea,
To meet her in the gloamin';
She fondly on my Bawtie cried,
Whene'er she saw us comin'.

But was the tyke not e'en as kind,
Though fast she beck'd to pat him;
He louped up and slaked her cheek,
Afore she could win at him.
But save us, sirs, when I gaed in,
To lean me on the settle,
Atween my Bawtie and the cat
There rose an awfu' battle.

An' though that Maggie saw him lay
His lugs in bawthron's coggie,
She wi' the besom lounged poor chit,
And syne she clapp'd my doggie.
Sae weel do I this kindness feel,
Though Mag she isna bonnie,
An' though she 's feckly twice my age,
I lo'e her best of ony.

May not this simple ditty show,
How oft affection catches,
And from what silly sources, too,
Proceed unseemly matches;
An' eke the lover he may see,
Albeit his joe seem saucy,
If she is kind unto his dog,
He 'll win at length the lassie.