Braes o' Bedlay

When I think on the sweet smiles o' my lassie,
My cares flee awa' like a thief frae the day;
My heart loups licht, an' I join in a sang
Amang the sweet birds on the braes o' Bedlay.
How sweet the embrace, yet how honest the wishes,
When luve fa's a-wooin', an' modesty blushes,
Whaur Mary an' I meet amang the green bushes
That screen us sae weel, on the braes o' Bedlay.

There 's nane sae trig or sae fair as my lassie,
An' mony a wooer she answers wi' "Nay,"
Wha fain wad hae her to lea' me alane,
An' meet me nae mair on the braes o' Bedlay.
I fearna, I carena, their braggin' o' siller,
Nor a' the fine things they can think on to tell her,
Nae vauntin' can buy her, nae threatnin' can sell her,
It 's luve leads her out to the braes o' Bedlay.

We 'll gang by the links o' the wild rowin' burnie,
Whaur aft in my mornin' o' life I did stray,
Whaur luve was invited and cares were beguiled
By Mary an' me, on the braes o' Bedlay.
Sae luvin', sae movin', I 'll tell her my story,
Unmixt wi' the deeds o' ambition for glory,
Whaur wide spreadin' hawthorns, sae ancient and hoary,
Enrich the sweet breeze on the braes o' Bedlay.