Oh, Blessing on Her Starlike Een

O blessing on her starlike e'en,
Wi' their glance o' love divine;
And blessing on the red, red lip,
Was press'd yestreen to mine!

Her braided locks that waved sae light,
As she danced through the lofty ha',
Were like the cluds on the brow o' night,
Or the wing o' the hoodie craw.

O mony a jimp an' gentle dame,
In jewell'd pomp was there;
But she was first among them a',
In peerless beauty rare!

Her bosom is a holy shrine,
Unstain'd by mortal sin,
An' spotless as the snaw-white foam,
On the breast o' the siller linn.

Her voice--hae ye heard the goudspink's note,
By bowery glen or brake?
Or listen'd ye e'er to the mermaid's lay,
By sea or mountain lake?

Hae ye dreamt ye heard, i' the bowers o' heaven,
The angel's melodie?
Or fancied ye listen'd the sang o' the spheres
As they swung on their path on hie?

Far sweeter to me was her lay o' love,
At the gloamin' hour yestreen;
An', oh! were I king o' the warld wide,
I would mak' that maiden my queen.