Book XII

Now Douglas furth his wayis tais,
And in that self tyme fell, throu cas,
That the Kyng of Ingland, quhen he
Wes cummyn with his gret menyhe
Neir to the place, as I said air,
Quhar Scottis men arayit war,
He gert arest all his battale
At othir als to tak consale,
Quhethir thai wald herbery thame that nycht,
Or than, but mair, ga to the ficht.
The vaward, that wist no kyn thing
Of this arest na thair duelling,
Raid to the Park all straucht thar way,
Forout styntyng, in gude aray.
And quhen the Kyng wist at thai weir
In haill battale cummand so neir,
His battale gert he weill aray.
He raid apon ane gray palfray,
Litill and joly, arayande
His battall, with ane ax in hande;
And on his basnet hye he bar
Ane hat off quyrbolle ay-quhar,
And thar-upon, in-to taknyng,
Ane hye croune, that he wes ane kyng.

And quhen Glowcister and Herfurd wer,
With thair battalis, approchand ner,
Befor thame all thar com rydand,
With helme on hed and sper in hand,
Schir Henry of Boune, the worthy,
That wes ane gud knycht and hardy,
And to the Erll of Herfurd cosyne,
Armyt in armys gude and fyne;
Com on a steid, a merk-schote neir
Before all othir that thair wer,
And knew the King, for that he saw
Hym swa araynge his men on raw,
And be the croun that wes set
Abovin his hed on the basnet;
And toward him he went in hy.
And quhen the Kyng so apertly
Saw hym cum forrouth all his feris,
In hy till hym his hors he steris;
And quhen Schir Henry saw the Kyng
Cum on for-outen abaysyng,
Till him he raid in full gret hy.
He thoucht that he suld weill lichtly
Wyn him, and haf hym at his will,
Sen he hym horsit saw so ill.
Than sprent thai sammyn in-till a lyng;
Schir Henry myssit the nobill Kyng;
And he, that in his sterapis stude,
With ax that wes bath hard and gude
With so gret mayn roucht hym ane dynt,
That nouthir hat no helm mycht stynt
The hevy dusche that he him gaf,
That he the hed till harnys claf.
The hand-ax-schaft frushcit in twa,
And he doune till the erd can ga
All flatlyngis, for hym falyheit mycht;
This wes the first strak of the ficht
That wes perfornyst douchtely.
And quhen the Kingis men so stoutly
Saw him, richt at the first metyng,
For-outen dout or abaysing,
Have slayn ane knycht swa at ane strak,
Sic hardyment than can thai tak,
That thai com on richt hardely.
Quhen Inglis men saw thame stoutly
Cum on, thai had gret abaysyng;
And specialy, for that the Kyng
So smertly that gud knycht had slayne;
Than thai with-drew thaim evir-ilkane,
And durst nocht than abyde to ficht,
Sa dred thai the Kyngis mycht.

And quhen the Kyngis men thame saw
Swa in haill battale thame withdraw,
A gret schot till thame can thai mak,
And thai in hy tuk all the bak,
And thai, that followit thame, has slayne
Sum of thame that thai haf our-tane.
Bot thai war few, forsuth to say;
Thar hors fete had ner all away.
Bot, how sa quheyn deit thair,
Rebotyt fellely thai war,
And raid thair gait with weill mair schame,
Be full fer, than thai com fra hame.

Qwhen at the King reparit was,
That gert his men leif all the chas,
The lordis of his cumpany
Blamyt him, as thai durst, gretly,
That he hym put in aventure
To mete so stith a knycht and sture,
In sic poynt as he than wes seyn;
For thai said, weill it mycht haf beyne
Caus of thair tynsale evirilkane.
The King thame answer maid he nane,
Bot menyt his hand-ax-schaft, that swa
Wes with ane strak brokyn in twa.

The Erll Thomas wes yheit fechtand
With fayis apon athyr hand,
And slew of thame ane quantite,
Bot wery war his men and he.
The-quhethir with wapnys sturdely
Thai thame defendit manfully,
Quhill that the lord Dowglas come neir,
That sped hyme apon gret maneir.
The Inglis men, that war fechtand,
Quhen thai the Douglas saw at hand,
Thai wayndist and maid ane opnyng.
Schir James Dowglas, be thair relyng,
Knew at thai war discumfit neir:
Than bad he thame that with him weir
Stand still, and pres no forthirmar;
“For thai that yhondir fechtand ar,”
He said, “ar of sa gret bounte,
“That thair fayis weill soyn sall be
“Discumfit throu thair awn mycht,
“Thouch no man help thaim for to ficht.
“And cum we now in-to fechting,
“Quhen thai ar at discumfyting,
“Men suld say we thame ruschit had,
“And swa suld thai, that caus has mad
“With gret travaill and hard fechting,
“Leis ane part of thair lovyng.
“And it war syn to leis his prys,
“That of sa soverane bounte is,
“That he, throu playn and hard fechting,
“Has heir eschewit unlikly thing;
“He sall haf that he wonnyn has.”
The Erll with thame that fechtand was,
Quhen he his fayis saw brawll swa,
In hy apon thame can he ga,
And pressit thame so woundir fast
With hard strakis, quhill, at the last,
Thai fled and durst nocht byde no mar.
Bath men and horse slayn left thai thar,
And held thair way in full gret hy,
Nocht all to-gidder bot syndrely,
And thai that war ourtane war slayne.
The layff went to thair host agane,
Off thair tynsall sary and wa.
The Erll, that had hym helpit swa,
And his men als that war wery,
Hynt of thair basnetis in-till hy
Till avent thame, for thai war hat,
Thai war all helit in-to swat.
Thame semyt men forsuth, I hicht,
That had fayndit thair fayis in ficht;
And swa thai did full douchtely.
Thai fand of all thair cumpany
That thar wes bot ane yheman slayn,
Than lovit thai God and war full fayn,
And blith that thai eschapit swa.
Toward the King than can thai ga,
And till him soyne weill cumin ar.
He askit thame of thair weill-fair,
And gladsum cher to thame he maid,
For thai so weill than born thame had.
Than all ran in-to gret dantee
The Erll of Murreff for till se;
For his hye worschip and valour
All yharnit till do him honour.
So fast thai ran till se hym thair,
That neir all sammyn assemblit war.
And quhen the gud King can thaim se
Befor him swa assemblit be,
Blith and glad that thair fayis war
Sa reboytit, as said wes ar,
A litill quhil he held him still,
Syne on this wis he said thame till.

“Lordyngis,” he said, “we aucht to luf
“Almychty God that sittis abuf,
“That sendis us so fair begynnyng.
“It is ane gret disconfortyng
“Till our fais, that on this wis
“Sa soyn reboytit has beyn twis.

“For quhen thai of thair host sall heir,
“And knaw suthly on quhat maneir
“Thair avaward, that wes so stout,
“And syne yhon othir joly rout,
“That I trow of the best men war
“That thai mycht get emang thame thar,
“War reboytit so suddandly,
“I trow, and knawis it all cleirly,
“That mony ane hert sall waverand be
“That semyt ere of gret bounte.
“And fra the hert be discumfite,
“The body is nocht worth a myt.
“Thar-for I trow that gud ending
“Sall follow till our begynnyng.
“The-quhethir I say nocht this yhow till,
“For that yhe suld follow my will
“To ficht, for in yhow sall all be.
“For gif yhe think spedfull that we
“Fecht, we sall ficht; and gif yhe will,
“We leiff, yhour liking to fulfill.
“I shall consent on alkyn wis
“Till do richt as yhe will devis;
“Tharfor sais on yhour will planly.”
Than with ane voce all can thai cry;
‘Gud King, forouten mair delay,
‘To-morn als soyn as yhe se day,
‘Ordane yhow haill for the battale,
‘For dout of ded we sall nocht fale;
‘Na nane payn sall refusit be
‘Quhill we have maid our cuntre fre!’

Qwhen the King herd thaim so manly
Spek to the ficht and hardely,
In hert gret gladschip can he ta,
And said; “Lordyngis, sen yhe will sa,
“Schapis us tharfor in the mornyng
“Swa that we, be the sonne-rysing,
“Haf herd mes, and be buskit weill
“Ilk man in-till his awne yscheill,
“Without the palyhownys arayit
“In battales with baneris displayit.
“And luk yhe na way brek aray;
“And, as yhe luf me, I yhow pray
“That ilk man for his awne honour
“Purvay hym a gud baneour.
“And quhen it cummys to the ficht,
“Ilk man set his hert and mycht
“To stynt our fais mekill pryd.
“On hors thai sall arayit ryd,
“And cum on yhow in weill gret hy;
“Meit thame with speris hardely,
“And wreik on thame the mekill ill
“That thai and tharis has done us till,
“And ar in will yheit for till do,
“Gif thai haf mycht till cum thar-to.
“And, certis, me think weill that we,
“Forout abasyng, aucht till be
“Worthy and of gret vassalage;
“For we have thre gret avantage.
“The first is, that we haf the richt;
“And for the richt ay God will ficht.
“The tothir is, thai ar cummyn heir
“For lypnyng in thair gret power,
“To seik us in our awne land;
“And has broucht her, richt till our hand,
“Riches in-to so gret plentee,
“That the pouerest of yhow sall be
“Bath rych, and mychty thar-with-all,
“Gif that we wyn, as weill may fall.
“The thrid is, that we for our lyvis
“And for our childer and our wyvis,
“And for the fredome of our land,
“Ar strenyheit in battale for to stand.
“And thai for thair mycht anerly,
“And for thai leit of us lichtly,
“And for thai wald distroy us all,
“Mais thame to ficht: bot yhet ma fall
“That thai sall rew thar barganyng.
“And, certis, I warne yhow of a thing,
“That happyn thame (as God forbeid).
“Till fynd fantis in-till our deid,
“Swa that thai wyn us opynly,
“Thai sall haf of us no mercy.
“And, sen we knaw thar felloune will,
“Me think it suld accorde till skill
“To set stoutnes agane felony,
“And mak swagat ane juperdy.
“Quharfor I yhow requeir and pray,
“That, with all mycht that evir yhe may,
“Yhe pres yhow at the begynnyng,
“But cowardis or abaysing,
“To meit thame that first sall assemmyll
“So stoutly that the henmast trymmyll.
“And menys on yhour gret manheid,
“Yhour worschip, and yhour douchty deid,
“And of the joy that yhe abyd,
“Giff that us fallis, as weill may tyd,
“Hap to vencus the gret battale.
“In-till yhour handis, forouten faill
“Yhe ber honour, pris, and riches,
“Fredome, welth, and gret blithnes,
“Gif yhe conteyn yhow manfully;
“And the contrar all halely
“Sall fall, gif yhe let cowardis
“And wikkidness yhour hertis surpris.
“Yhe mycht haf lifit in-to thrildome,
“Bot, for yhe yharnyt till haf fredome,
“Yhe ar assemblit heir with me;
“Tharfor is neidful that yhe be
“Worthy and wicht but abaysing.
“I warne yhow weill yheit of a thing,
“That mair myscheif may fall us nane
“Than in thair handis to be tane:
“For thai suld slay us, I wat weill,
“Richt as thai did my brothir Neill.
“Bot quhen I meyn of yhour stoutnes,
“And on the mony gret prowes
“That yhe have done so worthely,
“I trast and trowis sekirly
“Till have playne victor in this ficht.
“For thouch our fayis have mekill mycht,
“Thai haf the wrang, and succudry
“And covatis of senyhory
“Amovis thame forouten mor.
“Na us thar dreid thame bot befor;
“For strynth of this place, as yhe se,
“Sall let us enveronyt to be.
“And I pray yhow als specialy,
“Both mor and les all comonly,
“That nane of yhow for gredynes
“Haf e till tak of thair riches,
“Na presoners yheit for till ta,
“Quhill yhe se thame cumrayit swa,
“That the feld planly ouris be.
“And than, at yhour liking, may yhe
“Tak all the riches that thar is.
“Gif yhe will wirk apon this wis,
“Yhe sall haf victor sekirly.
“I wat nocht quhat mar say sall I;
“Yhe wat weill all quhat honour is,
“Conteyn yhow tharfor on sic wis
“That yhour honour ay savit be.
“And I hecht heir, in my lawte,
“Gif ony deis in this battaill,
“His air, but ward, releif, or taill,
“On the first day his land sall weild,
“All be he nevir so yhoung of eild.
“Now makis yhow reddy till the ficht.
“God help us, that is mast of mycht!
“I red armyt all nycht yhe be,
“Purvait in battale, sa that we
“To meit our fais ay be boune.”
Than ansuerd thai all with a sowne,
‘As yhe devis sa sall be done.’
Than till thair innys went thai soyne,
And ordanit thame for the fichting;
Syne assemblit in the evynnyng,
And swa-gat all the nycht baid thai
Till on the morn that it wes day.

Qwhen the Cliffurd, as I sayd air,
And all his rowt reboytit war,
And thar gret vaward alsua
Wes distrenyheit the bak till ta,
And thai haf tald thair reboyting,
Thai of the vaward, how the King
Slew at a strak, sa apertly,
A knycht that wycht wes and hardy;
And how all haill the Kyngis battaill
Schupe thame richt stoutly till assaill,
And Schir Edward the Brus alsua,
Quhen thai all haill the bak can ta:
And how thai lessit off thair men:
And Cliffurd had tald alsua then,
How Thomas Randall tuk the playne
With few folk, and how he has slayne
Schir Wilyhame Dancort the worthy;
And how the Erll faucht manfully,
That, as ane hyrcheoune, all his rout
Gert set out speris all about;
And how at thai war put agane,
And part of thair gud men wes slane:
The Inglis men sic abaysing
Tuk, and sik dreid of that tithing,
That in fyve hundreth placis and ma
Men mycht thame sammyn se rownand ga,
Sayand; “Our lordis, for thar mycht,
“Will all-gat ficht agane the richt.
“Bot quha sa warrayis wrangwisly,
“Thai faynd God all too gretumly,
“And thai may happin to mysfall;
“And sa may tyd that her we sall.”
And quhen thir lordis had persaving
Of the discomford, and the rownyng,
That thai held sammyn twa and twa,
Throu-out the hoost soyne gert thai ga
Heraldis, for till mak ane crye,
That nane discomford suld it be;
For in punyheis is oft hapnyne
Quhill for to wyne, and quhill to tyne;
And that, in-to the gret battale,
That apon na maner may fale;
Bot, gif the Scottis flee away,
Sall all amendit be, perfay.
Tharfor thai monyst thame to be
Of gret worschip and of bounte,
And stithly in the battale stand,
And tak amendis at thair hand.
Thai may weill monyss as thai will,
And thai may als hecht till fulfill
With stalwart strakis thair byddingis all;
Bot nocht-for-thi I trow thai sall
In-till thair hertis dredande be.
The King, with his consell preve,
Has tane to rede that he wald nocht
Fecht or the morne, bot he war socht.
Thair thai herbryit thame that nycht
Doune in the Kers, and gert all dicht,
And mak reddy ther apparale,
Agane the morne for the battale.
And, for in the Kers pulis war,
Howsis and thak thai brak, and bar
To mak bryggis quhar thai mycht pas.
And sum sais yheit, the folk that wes
In the castell, quhen nycht can fall,
For at thai knew thair myscheiff all,
Thai went furth neir all at thai war,
And durys and wyndowis with thaim bar,
Swa that thai had befor the day
Briggit the pollis, swa that thai
War passit our evir-ilkane,
And the hard feld on hors has tane
All reddy for till gif battale,
Arayit in till thair apparaill.

The Scottis men, quhen it wes day,
Thair mes devotly herd thai say,
Syne tuk a sop, and maid thame yhar.
And quhen thai all assemblit war,
And in thair battalis all purvait,
With thair braid baneris all displayit,
Thai maid knychtis, as it afferis
To men that oysis thai mysteris.
The Kyng maid Walter Stewart knycht,
And James of Douglas, that wes wicht,
And othir als of gret bounte
He maid, ilkane in thair degre.
Quhen this wes done, that I yhou say,
Thai went all furth in gud aray,
And tuk the playne full apertly.
Mony wicht man, gud and hardy,
That wer fulfillit of gret bounte,
In-till thair rowtis men mycht se.
The Inglis men in othir party,
That richt as angelis schane brichtly,
War nocht arayit on sic maner;
For all thair batalis sammyn wer
In a schiltrum; bot quhethir it wes
Throu the gret stratnes of the plas
That thai war in, till byd fichting,
Or that it wes for abaysing,
I wat nocht; bot in a schiltrum
It semyt thai war all and some,
Outane the vaward anerly,
That with ane richt gret cumpany
Be thame-selvin arayit war.
Quha had bene by mycht have sene thar
That folk ourtak ane mekill feld
On breid; quhar mony a schynand scheld,
And mony a burnyst bricht armour,
And mony man of gret valour,
And mony a baner bricht and scheyne,
Micht in that gret schiltrum be seyne.

And quhen the Kyng of Ingland
Saw Scottis men saw tak on hand
To tak the hard feild sa opynly,
And apon fut, he had ferly,
And said, “Quhat! will yhon Scottis ficht?”
‘Yhaa sekirly, Schir!’ than said a knycht,
Schir Ingerame the Umphrevell hat he,
And said, ‘Forsuth, Schir, now I se
‘All the mast ferlifull sycht
‘That evir I saw, quhen for to ficht
‘The Scottis men has tane on hand,
‘Agane the gret mycht of Ingland,
‘In plane hard feild to gif battale.
‘Bot and yhe will trow my consale,
‘Yhe sall discomfit thame lichtly.
‘Withdraws yhow hyne suddanly,
‘With battalis, baneris and pennownys,
‘Quhill that we pas our palyheownys;
‘And yhe sall se als soyne at thai,
‘Magre thair lordis, sall brek aray,
‘And scale thame our harnes to ta.
‘And, quhen we se thame scalit swa,
‘Prik we than on thame hardely,
‘And we sall haf thame weill lichtly.
‘For than sall nane be knyt to ficht,
‘That may withstand our mekill mycht.’
“I will nocht,” said the King, “perfay,
“Do sa: for ther sall no man say,
“That I suld eschewe the battale,
“Na withdraw me for sic rangale.”
Quhen this wes said that er said I,
The Scottis men full devotly
Knelyt all doune, till God to pray,
And a schort prayer thair maid thai
Till God, till help thame in that ficht.
And quhen the Inglis King had sicht
Of thame kneland, he said in hy--
“Yhon folk knelis till ask mercy.”
Schir Ingerame said; ‘Yhe say suth now;
‘Thai ask mercy, bot nocht at yhow:
‘For thair trespas to God thai cry.
‘I tell yhow a thing sekirly,
‘That yhon men will wyn all or de,
‘For dout of ded thar sall nane fle.’
“Now be it swa,” than said the Kyng.
And than, but langar delaying,
Thai gert trump up to the assemble.
On athir syd than men mycht se
Full mony wycht men and worthy,
All ready till do chevelry.

Thus war thai boune on athir syde;
And Inglis men, with mekill prid,
That war in-till thar avaward,
Till the battall that Schir Edward
Governyt and led, held straucht thair way.
The hors with spuris hardnyt thai,
And prikit apon thame sturdely;
And thai met thame richt hardely:
Swa that, at the assemble thair,
Sic a frusching of speris wair
That fer away men mycht it her.
At thar metyng, for outen wer,
Wer stedis stekit mony ane;
Mony gud man borne doune and slane,
And mony ane hardyment douchtely
Wes thair eschevit full hardely.
Thai dang on othir with wapnys ser;
Sum of the hors, that stekit wer,
Ruschit and relit rycht roydly.
Bot the remanant, nocht-for-thi,
That mycht cum to the assembling,
For that lat maid rycht no stynting,
Bot assemblit full hardely.
And thai met thame full sturdely,
With speris that wer scharp to scher,
And axis that weill grundyn wer,
Quhar-with wes roucht full mony rout.
The ficht wes thair so fell and stout,
That mony worthy men and wicht
Throu fors wes fellit in that ficht,
That had no mycht to rys agane.
The Scottis men fast can thame payne
Thair fais mekill mycht to rus.
I trow thai sall no payne refus,
Na perell, quhill thar fais be
Set in-till herd proplexite.

And quhen the Erll of Murref sa
Thair avaward saw stoutly ta
The way to Schir Edward all straucht,
That met thame with full mekill maucht.
He held his way with his baner
Till the gret rout, quhar sammyn wer
The nyne battales that wes so braid,
That so feill baneris with thame had,
And of men sa gret quantite,
That it war wonder for to se.
The gud Erll thiddir tuk the way
With his battale in gud aray,
And assemblit so hardely,
That men mycht her, that had beyn by,
A gret frusche of the speres that brast.
For thair fais assalyheit fast,
That on stedis, with mekill prid,
Com prikand as thai wald our-ryd
The Erll and all his cumpany.
Bot thai met thame so sturdely,
That mony of thame till erd thai bar.
For mony a steid wes stekit thar,
And mony gud man fellit undir feit
That had no power to ris yheit.
Ther men mycht se ane hard battale,
And sum defend and sum assale,
And mony a riall rymmyll ryde
Be roucht thair, apon athir syde,
Quhill throu the byrneis brist the blud,
That till the erd doune stremand yhud.
The Erll of Murreff and his men
So stoutly thame contenit then,
That thai wan plas ay mair and mair
On thair fais; the-quhethir thai war
Ay ten for ane, or ma, perfay;
Swa that it semyt weill that thai
War tynt emang so gret menyhe,
As thai war plungit in the se.
And quhen the Inglis men has seyne
The Erll and all his men be-deyne
Fecht sa stoutly, but effraying,
Rycht as thai had nane abaysing,
Thai pressit thame with all thar mycht.
And thai, with speris and suerdis brycht,
And axis that rycht scharply schar,
In-myd the visage met thame thar.
Thar men mycht se a stalwart stour,
And mony men of gret valour
With speris, macys, and with knyvis,
And othyr wapnys, vissill thair lyvis,
Swa that mony fell doune all ded;
The gyrs wox with the blude all red.
The Erll, that wicht wes and worthy,
And his men faucht so manfully,
That quha sa had seyne thaim that day,
I trow forsuth that thai suld say
That thai suld do thair devour wele,
Swa that thair fayis suld it feill.