Lines 250–371

ða se lig gewand on laðe men,
hæðne of halgum. Hyssas wæron
bliðemode, burnon scealcas
ymb ofn utan, alet gehwearf
teonfullum on teso. ðær to geseah
Babilone brego. Bliðe wæron
eorlas Ebrea, ofestum heredon
drihten on dreame, dydon swa hie cuðon
ofne on innan, aldre generede.
Guman glædmode god wurðedon,
under þæs fæðme þe geflymed wearð
frecne fyres hæto. Freobearn wurdon
alæten liges gange, ne hie him þær lað gedydon.
Næs him se sweg to sorge ðon ma þe sunnan scima,
ne se bryne beot mæcgum þe in þam beote wæron,
ac þæt fyr fyr scyde to ðam þe ða scylde worhton,
hwearf on þa hæðenan hæftas fram þam halgan cnihton,
werigra wlite minsode, þa ðe ðy worce gefægon.
Geseah ða swiðmod cyning, ða he his sefan ontreowde,
wundor on wite agangen; him þæt wræclic þuhte.
Hyssas hale hwurfon in þam hatan ofne,
ealle æfæste ðry; him eac þær wæs
an on gesyhðe, engel ælmihtiges.
Him þær on ofne owiht ne derede,
ac wæs þær inne ealles gelicost
efne þonne on sumera sunne scineð,
and deaw dryge on dæge weorðeð,
winde geondsawen. þæt wæs wuldres god
þe hie generede wið þam niðhete.
ða Azarias ingeþancum
hleoðrade halig þurh hatne lig,
dreag dæda georn, drihten herede,
wer womma leas, and þa word acwæð:
"Metod alwihta, hwæt! þu eart mihtum swið
niðas to nergenne. Is þin nama mære,
wlitig and wuldorfæst ofer werðeode.
Siendon þine domas in daga gehwam
soðe and geswiðde and gesigefæste,
swa þu eac sylfa eart.
Syndon þine willan on woruldspedum
rihte and gerume, rodora waldend.
Geoca user georne nu, gasta scyppend,
and þurh hyldo help, halig drihten,
nu we þec for þreaum and for ðeonydum
and for eaðmedum arna biddað,
lige belegde. We ðæs lifgende
worhton on worulde, eac ðon wom dyde
user yldran; for oferhygdum
bræcon bebodo burhsittende,
had oferhogedon halgan lifes.
Siendon we towrecene geond widne grund,
heapum tohworfene, hyldelease;
is user lif geond landa fela
fracoð and gefræge folca manegum,
þa usic bewræcon to þæs wyrrestan
eorðcyninga æhta gewealde,
on hæft heorugrimra, and we nu hæðenra
þeowned þoliað. þæs þe þanc sie,
wereda wuldorcyning, þæt þu us þas wrace teodest.
Ne forlet þu usic ane, ece drihten,
for ðam miltsum ðe ðec men hligað,
and for ðam treowum þe þu, tirum fæst,
niða nergend, genumen hæfdest
to Abrahame and to Isaace
and to Iacobe, gasta scyppend.
þu him þæt gehete þurh hleoðorcwyde,
þæt þu hyra frumcyn in fyrndagum
ican wolde, þætte æfter him
on cneorissum cenned wurde,
and seo mænigeo mære wære,
had to hebbanne swa heofonsteorran
bebugað bradne hwyrft, oððe brimfaroþes,
sæfaroða sand, geond sealtne wæg
in eare gryndeð, þæt his unrim a
in wintra worn wurðan sceolde.
Fyl nu frumspræce, ðeah heora fea lifigen!
Wlitiga þinne wordcwyde and þin wuldor on us!
Gecyð cræft and miht þæt þa Caldeas
and folca fela gefrigen habbað,
ða þe under heofenum hæðene lifigeað,
and þæt þu ana eart ece drihten,
weroda waldend, woruldgesceafta,
sigora settend, soðfæst metod!"
Swa se halga wer hergende wæs
metodes miltse and his mihta sped
rehte þurh reorde. ða of roderum wæs
engel ælbeorht ufan onsended,
wlitescyne wer on his wuldorhaman,
se him cwom to frofre and to feorhnere
mid lufan and mid lisse. Se ðone lig tosceaf,
halig and heofonbeorht, hatan fyres,
tosweop hine and toswende þurh þa swiðan miht,
ligges leoman, þæt hyra lice ne wæs
owiht geegled, ac he on andan sloh
fyr on feondas for fyrendædum.
þa wæs on þam ofne, þær se engel becwom,
windig and wynsum, wedere gelicost
þonne hit on sumeres tid sended weorðeð
dropena drearung on dæges hwile,
wearmlic wolcna scur. Swylc bið wedera cyst,
swylc wæs on þam fyre frean mihtum
halgum to helpe. Wearð se hata lig
todrifen and todwæsced þær þa dædhwatan
geond þone ofen eodon, and se engel mid,
feorh nerigende, se ðær feorða wæs,
Annanias and Azarias
and Misael. þær þa modhwatan
þry on geðancum ðeoden heredon,
bædon bletsian bearn Israela
eall landgesceaft ecne drihten,
ðeoda waldend. Swa hie þry cwædon,
modum horsce, þurh gemæne word:
"ðe gebletsige, bylywit fæder,
woruldcræfta wlite and weorca gehwilc!
Heofonas and englas, and hluttor wæter,
þa ðe ofer roderum on rihtne gesceaft
wuniað in wuldre, ða þec wurðiað!
And þec, ælmihtig, ealle gesceafte,
rodorbeorhtan tunglu, þa þe ryne healdað,
sunna and mona, sundor anra gehwilc
herige in hade! And heofonsteorran,
deaw and deor scur, ða ðec domige!