Psalm 50

Mildsa me, mihtig drihten, swa ðu manegum dydest,
æfter ðinre þære mycelan mildheortnysse.
Awend þine ansyne a fram minum
fræcnum fyrenum, and nu forð heonon
eall min unriht adwæsc æghwær symle.
Syle me, halig god, heortan clæne,
and rihtne gast, god, geniwa
on minre gehigde huru, min drihten.
Ne awyrp þu me, wuldres ealdor,
fram ðinre ansyne æfre to feore,
ne huru on weg aber þone halgan gast,
þæt he me færinga fremde wyrðe.
Syle me þinre hælu holde blisse,
and me ealdorlice æþele gaste
on ðinne willan getryme, weroda drihten.