Genesis A, lines 2506–2627

Unc hit waldend heht for wera synnum
Sodoma and Gomorra sweartan lige,
fyre gesyllan and þas folc slean,
cynn on ceastrum mid cwealmþrea
and his torn wrecan. þære tide is
neah geþrungen. Gewit þu nergean þin
feorh foldwege. þe is frea milde."
Him þa ædre Loth andswarode:
"Ne mæg ic mid idesum aldornere mine
swa feor heonon feðegange
siðe gesecan. Git me sibblufan
and freondscipe fægre cyðað,
treowe and hyldo tiðiað me.
Ic wat hea burh her ane neah,
lytle ceastre. Lyfað me þær
are and reste, þæt we aldornere
on Sigor up secan moten.
Gif git þæt fæsten fyre willað
steape forstandan, on þære stowe we
gesunde magon sæles bidan,
feorh generigan." Him þa freondlice
englas arfæste andswaredon:
"þu scealt þære bene, nu þu ymb þa burh sprycest,
tiða weorðan. Teng recene to
þam fæstenne; wit þe friðe healdað
and mundbyrde. Ne moton wyt
on wærlogum wrecan torn godes,
swebban synnig cynn, ær ðon þu on Sægor þin
bearn gelæde and bryd somed."
þa onette Abrahames mæg
to þam fæstenne. Feðe ne sparode
eorl mid idesum, ac he ofstum forð
lastas legde, oðþæt he gelædde
bryd mid bearnum under burhlocan
in Sægor his. þa sunne up,
folca friðcandel, furðum eode,
þa ic sendan gefrægn swegles aldor
swefl of heofnum and sweartne lig
werum to wite, weallende fyr,
þæs hie on ærdagum drihten tyndon
lange þrage. Him þæs lean forgeald
gasta waldend! Grap heahþrea
on hæðencynn. Hlynn wearð on ceastrum,
cirm arleasra cwealmes on ore,
laðan cynnes. Lig eall fornam
þæt he grenes fond goldburgum in,
swylce þær ymbutan unlytel dæl
sidre foldan geondsended wæs
bryne and brogan. Bearwas wurdon
to axan and to yslan, eorðan wæstma,
efne swa wide swa ða witelac
reðe geræhton rum land wera.
Strudende fyr steapes and geapes,
swogende leg, forswealh eall geador
þæt on Sodoma byrig secgas ahton
and on Gomorra. Eall þæt god spilde,
frea mid þy folce. þa þæt fyrgebræc,
leoda lifgedal, Lothes gehyrde
bryd on burgum, under bæc beseah
wið þæs wælfylles. Us gewritu secgað
þæt heo on sealtstanes sona wurde
anlicnesse. æfre siððan
se monlica (þæt is mære spell)
stille wunode, þær hie strang begeat
wite, þæs heo wordum wuldres þegna
hyran ne wolde. Nu sceal heard and steap
on þam wicum wyrde bidan,
drihtnes domes, hwonne dogora rim,
woruld gewite. þæt is wundra sum,
þara ðe geworhte wuldres aldor.
Him þa Abraham gewat ana gangan
mid ærdæge þæt he eft gestod
þær wordum ær wið his waldend spræc
frod frumgara. He geseah from foldan up
wide fleogan wælgrimne rec.
Hie þæs wlenco onwod and wingedrync
þæt hie firendæda to frece wurdon,
synna þriste, soð ofergeaton,
drihtnes domas, and hwa him dugeða forgeaf,
blæd on burgum. Forþon him brego engla
wylmhatne lig to wræce sende.
Waldend usser gemunde wærfæst þa
Abraham arlice, swa he oft dyde
leofne mannan. Loth generede,
mæg þæs oðres, þa seo mænegeo forwearð.
Ne dorste þa dædrof hæle
for frean egesan on þam fæstenne
leng eardigean, ac him Loth gewat
of byrig gangan and his bearn somed
wælstowe fyrr wic sceawian,
oðþæt hie be hliðe heare dune
eorðscræf fundon. þær se eadega Loth
wærfæst wunode, waldende leof,
dægrimes worn and his dohtor twa.
Hie dydon swa; druncnum eode
seo yldre to ær on reste
heora bega fæder. Ne wiste blondenfeax
hwonne him fæmnan to bryde him bu wæron,
on ferhðcofan fæste genearwod
mode and gemynde, þæt he mægða sið
wine druncen gewitan ne meahte.
Idesa wurdon eacne, eaforan brohtan
willgesweostor on woruld sunu
heora ealdan fæder. þara æðelinga
modor oðerne Moab nemde,
Lothes dohter, seo on life wæs
wintrum yldre. Us gewritu secgeað,
godcunde bec, þæt seo gingre
hire agen bearn Ammon hete.
Of þam frumgarum folces unrim,
þrymfæste twa þeoda awocon.
Oðre þara mægða Moabitare
eorðbuende ealle hatað,
widmære cynn, oðre weras nemnað,
æðelinga bearn, Ammonitare.
Gewat him þa mid bryde broðor Arones
under Abimelech æhte lædan
mid his hiwum. Hæleðum sægde
þæt Sarra his sweostor wære,
Abraham wordum (bearh his aldre),
þy he wiste gearwe þæt he winemaga,
on folce lyt freonda hæfde.