Genesis A, lines 2760–2880

þa com feran frea ælmihtig
to Sarrai, swa he self gecwæð,
waldend usser, hæfde wordbeot
leofum gelæsted, lifes aldor
eaforan and idese. Abrahame woc
bearn of bryde, þone brego engla,
ær ðy magotudre modor wære
eacen be eorle, Isaac nemde.
Hine Abraham on mid his agene hand
beacen sette, swa him bebead metod,
wuldortorht ymb wucan, þæs þe hine on woruld
to moncynne modor brohte.
Cniht weox and þag, swa him cynde wæron
æðele from yldrum. Abraham hæfde
wintra hundteontig þa him wif sunu
on þanc gebær. He þæs ðrage bad,
siððan him ærest þurh his agen word
þone dægwillan drihten bodode.
þa seo wyrd gewearð þæt þæt wif geseah
for Abrahame Ismael plegan,
ðær hie æt swæsendum sæton bu tu,
halig on hige, and heora hiwan eall,
druncon and drymdon. þa cwæð drihtlecu mæg,
bryd to beorne: "Forgif me, beaga weard,
min swæs frea, hat siðian
Agar ellor and Ismael
lædan mid hie! Ne beoð we leng somed
willum minum, gif ic wealdan mot.
Næfre Ismael wið Isace,
wið min agen bearn yrfe dæleð
on laste þe, þonne þu of lice
aldor asendest." þa wæs Abrahame
weorce on mode þæt he on wræc drife
his selfes sunu, þa com soð metod
freom on fultum, wiste ferhð guman
cearum on clommum. Cyning engla spræc
to Abrahame, ece drihten:
"Læt þe aslupan sorge of breostum,
modgewinnan, and mægeð hire,
bryde þinre! Hat bu tu aweg
Agar feran and Ismael,
cniht of cyððe! Ic his cynn gedo
brad and bresne bearna tudre,
wæstmum spedig, swa ic þe wordum gehet."
þa se wer hyrde his waldende,
draf of wicum dreorigmod tu,
idese of earde and his agen bearn.
"Sweotol is and gesene þæt þe soð metod
on gesiððe is, swegles aldor,
se ðe sigor seleð snytru mihtum
and þin mod trymeð,
godcundum gifum. Forðon ðe giena speow,
þæs þu wið freond oððe feond fremman ongunne
wordum oððe dædum. Waldend scufeð,
frea on forðwegas folmum sinum
willan þinne. þæt is wide cuð
burhsittendum. Ic þe bidde nu,
wine Ebrea, wordum minum,
þæt þu tilmodig treowa selle,
wæra þina, þæt þu wille me
wesan fæle freond fremena to leane,
þara þe ic to duguðum ðe gedon hæbbe,
siððan ðu feasceaft feorran come
on þas werþeode wræccan laste.
Gyld me mid hyldo, þæt ic þe hneaw ne wæs
landes and lissa. Wes þissum leodum nu
and mægburge minre arfæst,
gif þe alwalda, ure drihten,
scirian wille, se ðe gesceapu healdeð,
þæt þu randwigum rumor mote
on ðisse folcsceare frætwa dælan,
modigra gestreon, mearce settan."
ða Abraham Abimelehe
wære sealde þæt he wolde swa.
Siððan wæs se eadega eafora þares
in Filistea folce eardfæst,
leod Ebrea lange þrage,
feasceaft mid fremdum. Him frea engla
wic getæhte þæt weras hatað
burhsittende Bersabea lond.
ðær se halga heahsteap reced,
burh timbrede and bearo sette,
weobedd worhte, and his waldende
on þam glædstede gild onsægde,
lac geneahe, þam þe lif forgeaf,
gesæliglic swegle under.
þa þæs rinces se rica ongan
cyning costigan, cunnode georne
hwilc þæs æðelinges ellen wære,
stiðum wordum spræc him stefne to:
"Gewit þu ofestlice, Abraham, feran,
lastas lecgan and þe læde mid
þin agen bearn. þu scealt Isaac me
onsecgan, sunu ðinne, sylf to tibre.
Siððan þu gestigest steape dune,
hrincg þæs hean landes, þe ic þe heonon getæce,
up þinum agnum fotum, þær þu scealt ad gegærwan,
bælfyr bearne þinum, and blotan sylf
sunu mid sweordes ecge, and þonne sweartan lige
leofes lic forbærnan and me lac bebeodan."
Ne forsæt he þy siðe, ac sona ongann
fysan to fore. Him wæs frean engla
word ondrysne and his waldend leof.
þa se eadga Abraham sine
nihtreste ofgeaf. Nalles nergendes
hæse wiðhogode, ac hine se halga wer
gyrde grægan sweorde, cyðde þæt him gasta weardes
egesa on breostum wunode. Ongan þa his esolas bætan
gamolferhð goldes brytta, heht hine geonge twegen
men mid siðian. Mæg wæs his agen þridda
and he feorða sylf. þa he fus gewat
from his agenum hofe Isaac lædan,
bearn unweaxen, swa him bebead metod.
Efste þa swiðe and onette
forð foldwege, swa him frea tæhte
wegas ofer westen, oðþæt wuldortorht,
dæges þriddan up ofer deop wæter
ord aræmde. þa se eadega wer
geseah hlifigan hea dune
swa him sægde ær swegles aldor.
ða Abraham spræc to his ombihtum: