Psalm 63

Gehyr min gebed, halig drihten,
nu me costunge cnyssað geneahhe,
and wið egesan yfeles feondes
mine sawle gescyld symle æt þearfe.
þu me oft aweredest wyrigra gemotes
and fram þære menegeo þe man woldon
and unrihte æghwær fremman.
þa heora tungan teoð teonan gehwylce
sweorde efenscearpe and heora swiðne bogan,
and unscyldige mid þy scotian þenceað.
Hi hine samnuncga scearpum strelum
on scotiað, egsan ne habbað,
ac hi mid wraðum wordum trymmað
and sare sprecað: Hwa gesyhð usic?
Swa hi smeagað oft swiðost unriht
and on þam ilcan eft forweorðað,
þær hi mamriað man and unriht.
Gangeð man manig modig on heortan,
oðþæt hine ahefeð hælend drihten.
Syndon hyra wita scytelum cilda
æghwæs onlicost; ne him awiht þon ma
heora tungan nu teonan on sittað.
Ealle synd gedrefede þe hi on sioð;
sceal him manna gehwylc man ondrædan
and weorc godes wide mærsian
and his weorc ongitan mid wisdome.
Se soðfæsta symble on drihten
blissað baldlice, bote geweneð,
and hine heriað eac heortan clæne.