Psalm 66

Miltsa us, mihtig drihten, and us on mode eac
gebletsa nu; beorhte leohte
þinne andwlitan, and us on mode weorð
þuruh þine mycelnesse milde and bliðe.
And we þæs on eorðan andgyt habbað,
ure wegas wide geond þas werðeode
on þinre hælo healdan motan.
Folc þe andette; þu eart fæle god,
and þe andetten ealle þeoda.
Hæbbe þæs gefean folca æghwylc
and blissien bealde þeoda,
þæs þe þu hi on rihtum rædum demest
and eorðbuende ealle healdest.
Folc þe andetten fælne drihten
and þe andetten ealle þeoda.
Ge him eorðe syleð æþele wæstme;
gebletsige us bliðe drihten
and user god eac bletsige;
hæbbe his egesan eall eorþan gemæru.