Psalm 127

Eadige syndon ealle þe him ecne god
drihten ondrædað, and his gedefne weg
on hyra lifes tid lustum gangað.
þonne þu þines gewinnes wæstme byrgest,
etest oretes, and þu eadig leofast,
and þe wel weorðeð on wynburgum.
Beoð þines wifes welan gelice,
swa on wingearde weaxen berigean,
and on þines huses hwommum genihtsum.
Synd þine bearn swylce samed anlicast,
swa elebeamas æþele weaxen,
ymb þinne beod utan blæda standen.
Efne swa bið gebletsad beorna æghwylc
mann on moldan þe him metodes ege
on his dædum drihten forhtað.
þe of Sionbeorge swylce drihten
bealde bletsige, and þu bruce eac
on Hierusalem goda gehwylces
ealle lange dagas lifes þines.
And þu þinra bearna bearn sceawige,
geseo samed gangan sibb ofer Israhel.