Psalm 149

Singað samheorte sangas drihtne
and him neowne sang nu ða singað;
wese his herenes on haligra
clænre cyricean cyðed geneahhe.
Israhelas on hine eac blissien,
and Sione bearn symble hihtan
swiðust ealra.
Herigen his naman neode on ðreatum,
on timpano tidum heriað
and on psalterio singað georne.
Forðon on his folce is fægere drihtne
wel licendlic, and he wynlice
þam manþwærum syleð mære hælu.
þonne on wuldre gefeoð wel þa halgan,
beoð on heora husum bliðe gedreme.
Him on gomum bið godes oft gemynd;
heo þæs wislice wynnum brucað,
and sweord habbaþ swylce on folmum.
Mid þy hi wrecan þenceað wraðum cynnum
and ðrea þearle þeodum eawan.
And hio bindan balde þenceað
cyningas on campum, and cuðlice
heora æðelingas don on isene bendas,
þæt hio dom on him deopne gecyðan
and þæt mid wuldre awriten stande:
þis is haligra wuldor her on eorðan.