Lines 490–550

Hwæt! Hie wile lifigende late aðreotan,
ðæt heo ðurh fyrena geflitu fæhðo ne tydre."
Salomon cwæð:
"Nolde gæd geador in godes rice
eadiges engles and ðæs ofermodan;
oðer his dryhtne hierde, oðer him ongan wyrcan ðurh dierne cræftas
segn and side byrnan, cwæð ðæt he mid his gesiðum wolde
hiðan eall heofona rice and him ðonne on healfum sittan,
tydran him mid ðy teoðan dæle, oððæt he his tornes ne cuðe
ende ðurh insceafte. ða wearð se æðelra ðeoden
gedrefed ðurh ðæs deofles gehygdo; forlet hine ða of dune gehreosan,
afielde hine ða under foldan sceatas,
heht hine ðær fæste gebindan. ðæt sindon ða usic feohtað on.
Forðon is witena gehwam wopes eaca.
ða ðæt eadig onfand engla dryhten,
ðæt heo leng mid hine lare ne namon,
aweorp hine ða of ðam wuldre and wide todraf,
and him bebead bearn heofonwara
ðæt hie ec scoldon a ðenden hie lifdon
wunian in wylme, wop ðrowian,
heaf under hefonum, and him helle gescop,
wælcealde wic wintre beðeahte,
wæter in sende and wyrmgeardas,
atol deor monig irenum hornum,
blodige earnas and blace nædran,
ðurst and hungor and ðearle gewin,
egna egesan, unrotnesse;
and æghwylc him ðissa earfeða ece stondeð
butan edwende a ðenden hie lifigað."
Saturnus cwæð:
"Is ðonne on ðisse foldan fira ænig
eorðan cynnes, ðara ðe man age,
ðe deað abæde, ær se dæg cyme
ðæt sie his calendcwide arunnen
and hine mon annunga ut abanne?"
Salomon cwæð:
"æghwylcum men engel onsendeð
dryhten heofona ðonne dæg styreð;
se sceall behealdan hu his hyge wille;
grædig growan in godes willan,
murnan metodes ðrym, mid ðy ðe hit dæg bið.
ðonne hine ymbegangað gastas twegen;
oðer bið golde glædra, oðer bið grundum sweartra,
oðer cymeð
ofer ðære stylenan helle;
oðer hine læreð ðæt he lufan healde,
metodes miltse, and his mæga ræd,
oðer hine tyhteð and on tæso læreð,
yweð him and yppeð earmra manna
misgemynda, and ðurh ðæt his mod hweteð,
lædeð hine and læceð and hine geond land spaneð,
oððæt his ege bið, æfðancum full,
ðurh earmra scyld yrre geworden.
Swa ðonne feohteð se feond on feower gecynd,
oððæt he gewendeð on ða wyrsan hand
deofles dædum dæglongne fyrst,
and ðæs willan wyrcð ðe hine on woh spaneð.
Gewiteð ðonne wepende on weg faran
engel to his earde and ðæt eall sagað:
'Ne meahte ic of ðære heortan heardne aðringan
stylenne stan; sticað him tomiddes'"