Memento homo quod sinis es

Memento homo quod sinis es
Et in cenerem reverteris.

Erthe oute of erthe is wondirly wroghte,
Erthe has geten one erthe a dignite of noghte,
Erthe appon erthe hase sett alle his thoghte,
How that erthe appon erthe may be heghe broghte.

Erthe appon erthe wolde be a kinge;
Bot howe erthe to erthe sall, thinkes he no thinge.
When erthe bredes erthe, and his rentes home bringe,
Thane schalle erthe of erthe hafe full harde partinge.

Erthe appon erthe winnes castells and tourres,
Thane saise erthe unto erthe ‘ This is alle ourres’;
When erthe appon erthe hase bigged up his bourres,
Thane shalle erthe for erthe suffere scharpe scourres.

Erthe gos appon erthe as golde appon golde.
He that gose appon erthe gleterande as golde,
Like as erthe never more go to erthe scholde,
And yitt schall erthe unto erthe ga rathere than he wolde.

Now why that erthe luffes erthe, wondere me thinke,
Or why that erthe for erthe scholde other swete or swinke;
For when that erthe appon erthe is broghte within brinke,
Thane shall erthe of erthe hafe a foulle stinke.
Mors Solvit Omnia.