Aglasam

Çöksem diz üstü karşına hürmetle aglasam;
Öpsem dü pây-ı sâfını lezzetle aglasam,

Ben aglıyorken aglasa yagmurla âsmân
Birlikte âsmân ü tabiatle aglasam;

Giryem o rütbe kesb-i samimiyyet etse kim;
Bir mübtelâ gönüldeki rikkatle aglasam;

Sen zülf-i târümâırımı destinle okşasan
Cebhem dizinde, ben de sükûnetle aglasam;

Kalsam gözüm gözünde, elimde senin elin;
Mestî-yi bî-misâl-i muhabbetle aglasam

Sonra döküp huzûruna âlâm-ı hissimi
Teşrîh-i iştiyâkıma cür'etle aglasam;

Tasvîr ederken âfet-i hicrânı, herkesin
Vuslat deminde bulduğu rahatla aglasam;

Sen sergüzeşt-i rûhu işitmekle aglasan
Ben mâcera-yı kalbi hikâyetle aglasam

Ben aglasam, sen aglasan, âhenler aglasa,
Ben serbeser seninle halâvetle aglasam;

Sen rahmedip de va'd-i visâl eylesen bana,
Ben bahtımın kemâline hayretle aglasam

Atsam bütün vücûdumı âgûş-ı pâkine
Bir bînevâ çocuk gibi, minnetle aglasam;

Bâzû-yı rahm-ı izzetine ittikâ edip
Te'sir-i bahtiyârî-i vuslatla aglasam

Âh, aglasam, senin ile leb-ber-leb aglasam;
Bir kerrecikde bunda meserretle aglasam!