Son Arzu

Birlikte terk-i cism edelim mevte, bir gece
Mest-i garâm iken;

Kursun bahar, rûhumuz üstünde gizlice
Bir türbe-i semen!

Olsun tuyûr-ı rûhumuza havza-i türâb
Bir lâne-i şegaf

Tâ haşre dek mesîremiz olsun pür-âb ü tâb
Bir sâhil-i sadef!

Olsun şeb-i kıyâmete dek hem-sürûdumuz
Bir cûy-ı nağme-hîz;

Kalsın sular lebinde dil-i yek-vücûdumuz
Mes’ûd u hande-rîz!

Tev'em sürûşlar gibi ayn-ı cenâh ile
Uçsun hayâlimiz!

Gezsin hadika-i ebediyette el ele
Âmâl-i bâlimiz!

Âvize olsun âlem-i şevkinde onların
Bir bedr-i mübtedî;

Bir bûse-i muzî tuta fevkinden onların
Bir mâh-ı sermedî!