The Unco Grave

Bonnie Clouden, as ye wander
Hills, an' haughs, an' muirs amang,
Ilka knowe an' green meander,
Learn my sad, my dulefu' sang!
Braes o' breckan, hills o' heather,
Howms whare rows the gowden wave;
Blissful scenes, fareweel for ever!
I maun seek an unco grave.

Sair I pled, though fate, unfriendly,
Stang'd my heart wi' waes and dules,
That some faithfu' hand might kindly
Lay 't among my native mools.
Cronies dear, wha late an' early
Aye to soothe my sorrows strave,
Think on ane wha lo'es ye dearly,
Doom'd to seek an unco grave.

Torn awa' frae Scotia's mountains,
Far frae a' that 's dear to dwall,
Mak's my e'en twa gushin' fountains,
Dings a dirk in my puir saul.
Braes o' breckan, hills o' heather,
Howms whare rows the gowden wave,
Blissful scenes, fareweel for ever!
I maun seek an unco grave.