To the King, quhen mony Benefices vakit

Schir, at this feist of benefyce,
Think that small partis makis grit seruice,
And equale distributioun,
Makis thame content that hes ressoun;
And quha hes nane ar plesit na wyiss.

Schir, quhiddir is it mereit mair
To gif him drink that thristis sair,
Or fyll ane fow man quhyll he brist,
And lat his fallow de for thrist,
Quhylk wyne to drynk als worthie war?

It is no glaid collatioun
Quhair ane makis myrrie, ane vther lukis doun ;
Ane thristis, ane vther playis cop out :
Lat anis the cop ga round about,
And wyn the covanis banesoun.

Quod Dumbar quhone mony benefices vakit.