Ane Prayer for the Pest

O Eterne God! of power infinyt,
To quhois hie knawlege na thing is obscure
That is, or was, or evir sal be, perfyt,
Into Thy sicht, quhill that this warld indure,
Haif mercy of us, indigent and peure;
Thow dois na wrang to puneis our offens:
O Lord, that is to mankynd haill succure,
Preserve us fra this perrelus pestilens.

We The beseik, O Lord of Lordis all,
Thy eiris inclyne and heir our grit regrait;
We ask remeid of The in general,
That is of help and confort desolait;
Bot Thow with rewth our hairtis recreate,
We ar bot deid but only Thy clemens:
We The exhort, on kneis law prostrait,
Preserve us fra this perrellus pestilens.

We ar richt glaid Thow puneis our trespass
Be ony uthir tribulatioun,
Wer it Thy will, O Lord of Hevin, allaiss,
That we suld thus be haistily put doun,
And de as beistis, without confessioun,
That nane dar mak with uthir residence.
O Blissit Jesu, that woir the thorny croun,
Preserve us from this perrelus pestilens.

Use derth, O Lord, or seiknes, and hungir soir,
And slaik Thy plaig that is so penetryve.
Thy pepill ar perreist: quha ma remeid thairfoir,
Bot Thow, O Lord, that for thame lost Thy lyve?
Suppois our syn be to The pungityve,
Our deid ma nathing our synnys recompens.
Haif mercy, Lord! we ma not with The stry ve:
Preserve us from this perrellus pestilens.

Haif mercy, Lord! haif mercy, Hevynis King!
Haif mercy of Thy pepill penetent;
Haif mercy of our petous punissing;
Retreit the sentence of Thy just jugement
Aganis us synnaris, that servis to be schent
Without mercy; we ma mak no defens.
Thow that, but rewth, upoun the Rude was rent,
Preserve us from this perrellus pestilens.

Remember, Lord! how deir Thow hes us bocht,
That for us synnaris sched Thy pretius blude,
Now to redeme that Thow hes maid of nocht,
That is of vertew barrane and denude;
Haif rewth, Lord, of Thyne Awin symilitude,
Puneis with pety and nocht with violens:
We knaw it is for our ingratitude,
That we ar puneist with this pestilens.

Thow grant us grace for till amend our miss,
And till evaid this ere wall suddane deid;
We knaw our syn is all the cause of this,
For oppin syn thair is set no remeid:
The justice of God mon puneis than bot dreid;
For by the law He will with non dispens;
Quhair justice laikis, thair is eternall feid
Of G-od that suld preserf fra pestilens.

Bot wald the heiddismen, that suld keip the law,
Puneiss the peple for thair transgressioun,
Thair wald na deid the peple than ourthraw;
Bot thay ar gevin so planely till oppressioun,
That God will nocht heir thair intercessioun;
Bot all ar puneist for inobediens,
Be sword or deid, withouttin remissioun,
And hes just cause to send us pestilens.

Superne Lucerne! guberne this pestilens,
Preserve and serve that we not sterve thairin;
Declyne that pyne, be Thy devyne prudens;
O Trewth, haif rewth! lat not our slewth us twin;
Oursyt, full tyt, wer we contryt, wald blin,
Dissiver did never, quha evir The besocht;
Send grace, with space, and us imbrace fra syn;
Latt nocht be tynt that Thow so deir hes bocht.

O Prince preclair, this cair cotidiane,
We The exhort, distort it in exyle;
Bot Thow remeid, this deid is bot ane trane
For to dissaif the laif, and thame begyle;
Bot Thow, sa wyis, devyis to mend this byle.
Of this mischeif, quha ma releif us ocht?
For wrangus win, but Thow our syn oursyll:
Lat nocht be tynt that Thow so deir hes bocht.

Sen for our vyce that justice mon correct,
O King Most Hie, now pacifie Thy feid.
Our syn is huge, refuge we not suspect,
As Thou art Juge, deluge us of this dreid;
In tyme assent, or we be schent with deid,
We us repent and tyme mispent forthocht;
Thairfoir, evirmoir be gloir to Thy Godheid:
Lat nocht be tynt that Thow sa deir hes bocht.