Allan Dhu

I Like to see you, Allan Dhu,
I like wi' you to meet,
But dinna say to me you loe,
For that wad gar me greet.
I like to see you smile on me
Amang our maidens a',
But, oh ! ae vow o' love frae you
I cou'dna stand ava,
Ay, ye may smile, but dinna speak ;
I ken what ye've to say ;
Sae, either hand your tongue sae sleek,
Or look another way ;
For, should it be of love to me,
In manner soft and bland,
I wadna ye my face should see
For a' Bredalbin's land.

Oh ! Allan Dhu, 'tis nought to you
Of love to gibe and jeer ;
But little ken ye of the pang
A maiden's heart maun bear,
When a' on earth that she hauds dear,
The hope that makes her fain,
Comes plump at aince — Oh, me ! the thought
'Maist turns my heart to stane !

No, Allan, no — I winna let
You speak a word the night :
Gang hame, an' write a lang letter,
For weel ye can indite.

And be it love, or be it slight,
I then can hae my will,
I'll steal away, far out o' sight,
An' greet, an' greet my fill.