Auld Joe Nicholson's Nanny

The daisy is fair, the day-lily rare,
The bud o' the rose as sweet as it's bonny ;
But there ne'er was a flower, in garden or bower,
Like auld Joe Nicholson's bonny Nanny !
O, my Nanny !
My dear little Nanny I
My sweet little niddlety-noddlety Nanny !

There ne'er was a flower,
In garden or bower,
Like auld Joe Nicholson's bonny Nanny !

Ae day she came out, wi' a rosy blush,
To milk her twa kie, sae couthy and canny ;
I cower'd me down at the back o' the bush,
To watch the air o' my bonny Nanny.
O, my Nanny, &c.

Her looks that stray'd o'er nature away,
Frae bonny blue een sae mild an' mellow,
Saw naething sae sweet in nature's array,
Though clad in the morning's gowden yellow.
O, my Nanny, &c.

My heart lay beating the flowery green
In quaking, quivering agitation,
An' the tears cam' tricklin' down frae my een,
Wi' perfect love an' wi' admiration.
O, my Nanny, &c.

There's mony a joy in this warld below,
An' sweet the hopes that to sing were uncanny;
But of all the pleasures I ever can know,
There's nane like the love o' my bonny Nanny.
O, my Nanny !
My dear little Nanny !
My sweet little niddlety-noddlety Nanny !
There ne'er was a flower,
In garden or bower,
Like auld Joe Nicholson's bonny Nanny !