Mary

There lives a young lassie
Far down yon lang glen,
How I lo'e that lassie
There's nae ane can ken!
Oh! a saint's faith may vary,
But faithfu' I'll be--
For weel I lo'e Mary,
And Mary lo'es me.

Red, red as the rowan
Her smiling wee mou,
An' white as the gowan
Her breast and her brow;
Wi' the foot o' a fairy
She links o'er the lea--
Oh! weel I lo'e Mary,
An' Mary lo'es me.

Where yon tall forest timmer,
An' lowly broom bower,
To the sunshine o' simmer,
Spread verdure an' flower;
There, when night clouds the cary,
Beside her I'll be--
For weel I lo'e Mary,
An' Mary lo'es me!